2 fevral Azərbaycanın təqvimində sadəcə bir tarix deyil. Bu gün ölkənin gənclik səsi ucalır, gənc qəlblərin enerjisi millətin nəbzi ilə birləşir, tarixlə gələcək vahid bir siqlətdə qovuşur.
Və bu gündə dünən məktəb partası arxasında oturan, bu gün isə müstəqil Azərbaycanın gələcəyini quran gənclərlə birlikdə keçdiyimiz yolu dəyərləndiririk.
Gənclər Gününün kökləri 1996-cı ilə dayanır. Həmin il Bakıda keçirilən Azərbaycan Gənclərinin Birinci Forumu ölkənin hər yerindən gəlmiş iki minə yaxın gənci bir araya gətirdi. Toplantı rəsmi çıxışlar üçün adi bir tədbir deyildi - forumda yeni ümidlərin və ambisiyaların səsi eşidildi. Forumda yeni bir fəlsəfə doğuldu: Azərbaycan yalnız keçmişin şanlı səhifələri ilə yox, burda və indi qurulan gələcəyi ilə də var olmalıdır. Həmin gələcəyin memarları məhz gənclər olmalıdır.
Millətin və dövlətin sabahına yönəlmiş baxış olmasaydı, forum sadəcə bir başlanğıc nöqtəsi olaraq qalardı bəlkə də.
Baxış fərqli, müdrik, misilsizdi: gəncləri statistik göstərici yox, ölkənin inkişaf qüvvəsi kimi görən bir liderin baxışı.
Ümummilli Lider Heydər Əliyev tarixi bir fərman imzalayaraq 2 fevralı Azərbaycan Gəncləri Günü elan etdi. Bu, təkcə hüquqi sənəd deyil, siyasi bir mesaj idi: “Gənclər Azərbaycandır, Azərbaycan isə gənclər!”
Bu forum dövlət gənclər siyasətinin məqsədyönlü şəkildə formalaşdırılması üçün bir başlanğıc nöqtəsi oldu. Burada müəyyən edildi ki, gənclər sadəcə ölkənin gələcəyi deyil, onun bu günü, dəyişikliklərin hərəkətverici qüvvəsidir. Bu hadisənin əhəmiyyəti Ulu Öndər Heydər Əliyevin 1 fevral 1997-ci il tarixində imzaladığı fərmanla rəsmiləşdirildi və 2 fevral Azərbaycan Gəncləri Günü elan olundu. Bu, yalnız siyasi deyil, həm də humanitar sahədə Azərbaycanın liderliyinin göstəricisi idi, burada gənclər cəmiyyətin mərkəzində dayanır.
Ümummilli Lider Heydər Əliyev hər zaman gəncləri millətin strateji resursu kimi dəyərləndirib. Onun gənc nəslin potensialına olan inamı dövlət siyasətinin əsas təməlinə çevrildi və bu yanaşma zaman keçdikcə daha da möhkəmləndi. Azərbaycan Prezidenti, Müzəffər Ali Baş Komandan İlham Əliyev böyük Liderin müəyyən etdiyi kursu davam etdirərək, gənclər siyasətinə yeni nəfəs gətirdi, onu konkret məzmun və müasir prioritetlərlə zənginləşdirdi. Bu gün gənclər siyasəti artıq sadəcə proqramlar və təşəbbüslər toplusu deyil - bu, Azərbaycan gənclərinin gücünə inama əsaslanan bütöv bir fəlsəfədir.
2007-ci ildə mühüm bir sənəd qəbul edildi — "2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı". Proqram minlərlə azərbaycanlı gənc üçün dünyanın aparıcı universitetlərinin qapılarını açdı, onlara ən yüksək səviyyədə təhsil almaq imkanı yaratdı. Bu gənclər vətənə yalnız biliklərlə deyil, yeni baxışlar, təzə ideyalarla, həyata keçirməyə hazır olduqları innovativ layihələrlə qayıtdılar.
Beləliklə, Azərbaycan postsovet məkanında və Şərqi Avropada gənclərin gününü dövlət səviyyəsində təsis edən ilk ölkə oldu. Birinci olmaq çətindir, amma məhz bu çətinlik Azərbaycan xarakterinin mahiyyətini göstərir - gözləmək yox, önə çıxaraq lider olmaq!
Bu gün Azərbaycanda gənclər siyasəti sadəcə formal proqramlar toplusu deyil. Bu, hər bir gəncin özünü böyük bir milli layihənin bir hissəsi kimi hiss etdiyi mürəkkəb və çoxşaxəli bir sistemdir. Dövlət gənclərə sadəcə qayğı göstərmir - onlara güvənir.
Güvən də gənclərin dövlətə dəfələrlə böyük etimadı qismində geri dönür.
Azərbaycan gəncləri dövlət proqramları sayəsində dünyanın ən nüfuzlu universitetlərində təhsil alır. Onlar alim, mühəndis, sahibkar olur, Azərbaycanın adını dünyaya tanıdan startaplar yaradırlar. Amma Azərbaycan gənclərinin şöhrəti yalnız elm və iqtisadiyyat sahəsində deyil. İdman da onların ruh gücünü və qələbə əzmini nümayiş etdirdiyi bir arenadır. Olimpiya medalları, dünya çempionatları, beynəlxalq turnirlər - bunlar təkcə fərdi atletlərin uğuru deyil. Bu, Azərbaycan gənclərinin qalib gəlməyi bacardığının sübutudur.
Gəncliyimizin cəsarət və sədaqətinin ən parlaq sübutu 44 günlük İkinci Qarabağ Müharibəsində öz əksini tapdı. Ədalət uğrunda, işğal altındakı torpaqların azadlığı naminə apardıqları bu mübarizədə gənclər sadəcə döyüşçü olmadılar - onlar milli qürurun rəmzinə çevrildilər. Müstəqil Azərbaycanın bayrağı altında böyüyən bu gənclər döyüşə gedərkən yalnız torpağı deyil, millətin şərəfini qoruduqlarını bilirdilər. Onlar sübut etdilər ki, vətənpərvərlik gurultulu sözlər deyil, ölkənin gələcəyi naminə özünü fəda etməyə hazır olmaqdır.
Hər bir xalqın tarixində unudulmaz anlar yaşanır, sonra da ləyaqətin, cəsarətin, şərəfin və Vətənə sədaqətin ölçüsü kimi yaddaşlarda qalır. Azərbaycan gəncliyi üçün belə bir an İkinci Qarabağ Müharibəsi oldu - ön cəbhədə döyüşən əsgərlərlə milyonlarla insanın ürəklərinin bir döyündüyü 44 gün. Hər gün yeni qəhrəmanlar doğurdu, ədalətə inam sarsılmaz bir qüvvəyə çevrildi. Milli dastanın mərkəzində isə Azərbaycan gəncliyi dururdu - “Vətən”, “Şərəf”, “Müstəqillik” kimi sözlər onlar üçün sadəcə anlayışlar deyil, həyatın məğzi, var olma səbəbi, taleyin və tarixin çağırışı idi.
2020-ci il sentyabrın 27-də ilk atəş səsləri eşidiləndə, bu, bir çoxları üçün sadəcə hərbi əməliyyatın başlanğıcı deyil, Vətənin səslənişiydi.
Minlərlə gənc, həyatın dadını yeni-yeni duymağa başlayan oğul və qızlar əmr gözləmədən könüllü olaraq Vətən bayrağı altında cəbhəyə yollanmaq istədiklərini bəyan etdilər.
O günləri unutmaqmı olar?
Səfərbərlik məntəqələrinin qarşısında izdihamlardı - hər kəs yağı düşmənlə döyüşmək, Vətən torpaqlarının işğaldakı qismini azad etmək üçün döyüşlərə könüllü yollanmaq istəyirdi.
Çünki onlar müstəqillik dövründə doğulmuşdular, bir hissəsinin torpaqlarının işğal altında olduğunu bilə-bilə böyümüşdülər, amma heç vaxt bununla barışmamışdılar. Onların qanında təkcə keçmişin xatirəsi deyil, azadlıq eşqi, ədalət hissi və dövlətlərinə duyduqları qürur da axırdı.
Düşmənə qarşı vuruşan gənclər sadəcə əsgər deyildilər. Onlar yeni Azərbaycan ruhunun təcəssümü idilər - savadlı, özünə inamlı, texnologiyaya bələd və dərin vətənpərvər. Onların arasında xaricdə təhsil almış, sülh dövründə karyera qurmuş, həyat arzularının astanasında olanlar da vardı. Vətən səsləyəndə bütün şəxsi istəklər və arzular arxa plana keçdi - öndə ata-babalarının qanı ilə suvarılmış, işğalla təhqir edilmiş Azərbaycan torpağı dayandı.
İkinci Qarabağ Müharibəsi hər hərfi Azərbaycan gənclərinin qanı və təri ilə yazılmış qəhrəmanlıq salnaməsidir. Cəbrayıl, Füzuli, Zəngilan, Qubadlı və nəhayət, Şuşa döyüşlərində gənclər sübut etdilər ki, vətənpərvərlik sadəcə kağız üzərində yazılan sözlər deyil, hər an həyatı qurban verməyə hazır olan əzmli addımlardır.
...Şuşa - Qarabağın ürəyi, Azərbaycan mədəniyyətinin və mənəviyyatının simvolu - müharibənin ən şanlı səhifələrindən birinin yazıldığı meydan oldu. Gənc döyüşçülər ağır texnikasız, yalnız öz əllərinin gücünə, ruhlarının möhkəmliyinə və qələbəyə sarsılmaz inamlarına arxalanaraq, sarp qayaları fəth etdilər. Onlar bilirdilər ki, hər addım həyatlarının sonuncusu ola bilər, amma heç kim geri çəkilmədi. Çünki onların arxasında Vətən, qarşılarında isə azadlıq dayanırdı.
Qələbə asan başa gəlmədi. Azərbaycan bu qələbəni ən qiymətli sərvəti - öz övladlarının canı bahasına qazandı. Amma onların qurbanı hədər getmədi. Hər bir şəhid təkcə tarix kitablarında bir səhifə deyil, millətin genetik yaddaşının bir hissəsi, Vətən sevgisinin insanı hansı zirvələrə ucalda biləcəyinin simvoludur.
Bu gün onların adları küçələrə, məktəblərə, abidələrə verilir. Amma ən önəmlisi odur ki, onlar milyonlarla insanın qəlbində yaşayırlar.
Yurddakı uşaqlar onların şücaətindən ilham alaraq böyüdükcə, ölkə əmin ola bilər: azadlıq və müstəqillik ruhu əbədi yaşayacaq.
İkinci Qarabağ Müharibəsi bütün dünyaya göstərdi ki, Azərbaycan gəncliyi sadəcə cəmiyyətin bir hissəsi deyil. Onlar bu millətin döyünən ürəyi, sarsılmaz iradəsi və qürur mənbəyidir. Onlar sübut etdilər ki, şərəf və ədalət uğrunda mübarizədə yaşın heç bir önəmi yoxdur. Ən vacibi - ruh gücü, haqqına inam və sonadək mübarizə aparmaq iradəsidir.
Müharibə təkcə hərbi bacarıq və cəsarətin nümayişi deyil, həm də Azərbaycan gənclərinin intellektual potensialının gücünü göstərdi. Müasir döyüşlərdə yalnız fiziki güc deyil, texnologiyalara yiyələnmək də qələbənin əsas açarıdır. Və məhz Azərbaycan gəncləri yeni dövrün ön cəbhəsində yer aldılar.
Azərbaycan Ordusu sübut etdi ki, yüksək texnologiyalar qələbənin silahına çevrilə bilər. Pilotsuz uçuş aparatları (PUA), kəşfiyyat sistemləri, kiber əməliyyatlar - bütün bunlar müharibə strategiyasının tərkib hissəsinə çevrildi.
Əsas rolu gənc mütəxəssislər oynadı. Onlar sadəcə monitor arxasında oturan texniki işçilər deyildilər. Onlar yeni döyüş cəbhəsinin əsgərləri idilər. Onlar üçün hər bir kod sətri dəqiq atəş, hər bir alqoritm isə strateji üstünlüyə aparan addım idi. Onlar sübut etdilər ki, intellekt və innovasiya bəzən fiziki cəsarət qədər həlledici ola bilər.
Hər bir texnoloji nailiyyətin arxasında isə proqramlaşdırıla bilməyən bir güc dayanırdı - Vətən eşqi!
Bu hiss boş yerdən yaranmır. Bu, dövlət siyasətinin məqsədyönlü nəticəsidir, təhsil proqramlarında, mədəni təşəbbüslərdə, milli yaddaşda kök salmış bir ideologiyadır.
Prezident İlham Əliyev, böyük lider Heydər Əliyevin yolunu davam etdirərək, hər zaman vurğulayıb: “Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram". Bu sözlər sadəcə siyasi şüar deyil. Bu, gənclərin yalnız gələcəyin deyil, bu günün də bir hissəsi olduğunu göstərən fəlsəfənin ifadəsidir.
Azərbaycan gəncləri vətənpərvərliyi sadəcə formal dərslərdən yox, real nümunələrdən öyrənir. Onlar ailələrinin tarixindən, yaşıdlarının qəhrəmanlıqlarından, hər bir addımın vətənin ucalığına töhfə olduğunu dərk etməklə böyüyürlər.
Bu gün Azərbaycan öz gələcəyini qurarkən, bu gənc qəhrəmanlar ölkənin sarsılmaz təməl daşı olaraq qalırlar. Onların qəhrəmanlığı keçmişin bir hissəsi deyil. O, yeni nəsillərə yol göstərən işıqdır, azadlığın hədiyyə deyil, uğrunda mübarizə aparılması və qorunması lazım olan dəyər olduğunu xatırladan bir simvoldur.
Məmləkətimizin və dövlətimizin qəlbində bu alov yanmağa davam etdikcə, bu ölkə yaşayacaq, inkişaf edəcək və həmişə qələbə qazanacaq.
Azərbaycan Gəncləri Gününün tarixi 2 fevral 1996-cı ildən başlayır. Həmin gün Bakıda keçirilən Azərbaycan Gənclərinin Birinci Forumu sadəcə bir toplanış deyildi — bu, ölkənin gələcəyi üçün məsuliyyətini dərk edən yeni bir nəslin doğuluşu idi. Azərbaycanın bütün bölgələrindən gəlmiş 2000-dən artıq gənc bir araya toplanaraq təkcə aktual problemləri müzakirə etmədi, həm də sabahın üfüqlərini müəyyənləşdirdi. Onlar özlərində gücə inamı, ölkənin müstəqilliyini sadəcə tarixi bir fakt kimi deyil, şəxsən onlara ünvanlanan bir çağırış kimi qəbul edən enerjini daşıyırdılar.
Gənclər siyasəti eyni zamanda sosial məsələlərə diqqət yetirir, hər bir gəncin sosial statusundan asılı olmayaraq imkanlar yaratmağa çalışır. Dövlət proqramları gənclərin cəmiyyətə inteqrasiyasına, karyera inkişafına və özünüreallaşdırmasına şərait yaradır.
Bu sahədə Heydər Əliyev Fondu xüsusi rol oynayır. Azərbaycanın Birinci xanımı Mehriban Əliyevanın rəhbərlik etdiyi fond istedadlı gənclərin aşkar edilməsi və dəstəklənməsi, təhsil və mədəni təşəbbüslərin inkişaf etdirilməsi üçün mühüm layihələr həyata keçirir.
Azərbaycan elə bir dövlətdir ki, burada gənclər təkcə cəmiyyətin iştirakçıları deyil, onun formalaşdırıcı qüvvəsidir. İT və fintex sahəsində startaplardan tutmuş tibb və mühəndislik sahəsində elmi araşdırmalara, idman arenalarından beynəlxalq mədəni forumlara qədər hər yerdə gənc azərbaycanlıların adları eşidilir. Onlar öz istedadları və zəhmətləri ilə ölkənin yeni simasını yaradırlar.
Bu nəsil çətinliklərdən qorxmur. Onlara hazır cavablar lazım deyil — onlar problemlərə öz həll yollarını tapırlar. İnnovativ layihələr yaradır, beynəlxalq olimpiadalarda iştirak edir, qrantlar qazanır və ölkənin sərhədlərindən kənarda biznes layihələri qururlar. Onlar qlobal düşünür, amma Vətənə olan məsuliyyət hissi ilə hərəkət edirlər. Onların uğurları şəxsi nailiyyətlər deyil, Azərbaycanın beynəlxalq arenadakı nüfuzuna və gücünə töhfədir.
Azərbaycan gəncliyinin gələcəyi abstrakt bir xəyal deyil. Bu, real layihələr, yeni texnologiya mərkəzləri, yaradıcı sənaye sahələri, elmi laboratoriyalar və mədəni təşəbbüslərdir ki, artıq bu gün ölkənin simasını dəyişir. Ən vacibi isə, gəncliyin bu nailiyyətləri qorumağa və daha da artırmağa hazır olmasıdır. Çünki Azərbaycan gəncliyi azadlıq və müstəqilliyin dəyərini yaxşı bilir.
... Azərbaycan Gəncləri Günü sadəcə təqvimdə bir tarix deyil. Bu, ölkənin öz övladlarının gözlərinə baxdığı və onların simasında gələcəyini gördüyü bir gündür. Bu, hər bir Azərbaycan gəncinin yalnız ölkəsi ilə fəxr etdiyi deyil, həm də onun taleyinə görə şəxsi məsuliyyət daşıdığı bir gündür. Bu, Azərbaycanın imkanlar ölkəsi olduğuna, burada gənclərin yalnız "gələcəyin ümidləri" deyil, artıq "bu günün inkişaf qüvvəsi" olduğuna inamın bayramıdır.
Azərbaycan gəncliyi sadəcə ölkənin gələcəyi deyil. Onlar bu günün gücü, enerjisi, zəkanı və millətin ürəyidir. Bu, heç vaxt sönməyəcək bir alovdur - Vətən sevgisi ilə, biliklərə can atmaqla və qəhrəmanlığa hazır olmaqla yanır. Məzkur alov Azərbaycan gənclərinin qəlbində yaşadığı müddətcə, Azərbaycan həmişə güclü, azad və məğrur olacaq.
Gənclər Günü — Azərbaycanın gücünü yaradanları ucaltdığımız bir gündür. Bu bayram təkcə gənclər üçün deyil, hər bir azərbaycanlı üçündür. Çünki hər bir gəncin gülümsəməsində, hər bir uğurunda Azərbaycanın gələcəyi əks olunur. Bu, bizə inamla deməyə imkan verir: Azərbaycan — imkanlar ölkəsidir, burada gənclər sadəcə ümid deyil, əsas hərəkətverici qüvvədir. Və gənclərin qəlbində Vətənə olan sevgi alovu yandıqca, Azərbaycan daim irəli gedəcək.
Bu gün Azərbaycan gələcəyə inamla baxır və gənclərin rolu daha da əhəmiyyətli olur. Onlar sadəcə cəmiyyətin bir hissəsi deyillər - onlar bu cəmiyyətin ürəyi, nəbzi və enerjisidir. Azərbaycan gəncləri təkcə şanlı keçmişin varisləri deyil, həm də sabahın böyük Azərbaycanın qurucularıdır. Onlar həmişə Azərbaycanın zirvələrə doğru irəliləyən ruhunu əks etdirirlər. Və qəlblərində bu Vətən sevgisi yaşadığı müddətcə, Azərbaycan heç vaxt məğlub olmayacaq.
Elçin ALIOĞLU (Trend)
