Daxili İşlər Nazirliyi (DİN) sosial şəbəkələrdə hərbi qulluqçu adından paylaşımlar edən Salyan rayon sakini barəsində məlumat yayıb.
Senzor.az DİN Mətbuat Xidmətinin Şirvan regional qrupuna istinadən bildirir ki, Hərbi Polis əməkdaşı geyimi formasından və fərqlənmə nişanlarından istifadə edərək müxtəlif zabit rütbələri ilə “Gülər Məmmədova” adı altında “hərbi226” hesabından paylaşımlar edən 1992-ci il təvəllüdlü R.B barəsində protokol tərtib olunub.
Həmin şəxsin əməlində İnzibati Xətalar Məcəlləsinin 534-cü maddəsinə müvafiq olaraq, hərbi qulluqçuların fərqlənmə nişanları olan hərbi və xüsusi geyim formalarını qanunsuz olaraq daşımanın tərkib əlamətləri olduğuna görə toplanmış materiallar məhkəməyə göndərilib.
R.B-nın evində olan hərbi təyinatlı geyim dəstləri aşkar olunaraq götürülüb.
Polis əməkdaşları onunla fərdi-profilaktik söhbətlər apararaq, əməlinin hüquqazidd olmasını özünün və ailə üzvlərinin diqqətinə çatdırıblar.
