İranın Ali lideri Müctəba Xamenei ABŞ-da keçirilən aralıq seçkilərin nəticələrinin ardından Amerikan liderliyində və ya partiya dinamiklərində dəyişikliklərin Vaşinqtonun İrana yönəlmiş düşmənliyini dəyişdirməyəcəyini bildirib.

Senzor.az yerli KİV-ə istinadən bildirir ki, Ali lider 1979-cu ildə Tehrandakı ABŞ səfirliyinə hücumun ildönümünü qeyd edərək “Qlobal imperializmə qarşı milli mübarizə günü” münasibətilə yazılı bəyanat verib.

ABŞ-ın İran millətini qeyd-şərtsiz ram etməyi hədəflədiyini bildirən Xamenei qeyd edib ki, düşmənə ən kiçik güzəşt belə müharibədə həlak olanların fədakarlığını mənasız edəcək və qarşı tərəfi yeni tələblər irəli sürməyə, hücumlara başlamağa cəsarətləndirəcək.

Prezident Donald Trampın mənsub olduğu Respublikaçılar partiyasının aralıq seçkilərdə məğlubiyyətinə toxunan Xamenei bu nəticələrin ABŞ-ın  İrana qarşı siyasətinə təsir etməyəcəyini vurğulayıb və Vaşinqtonun davranışında dəyişiklik gözləyənlərin “dərindən yanıldığını” bildirib.

Fevralın 28-də ABŞ və İsrailin İrana qarşı başlatdığı müharibə nəticəsində İranın Hörmüz boğazına nəzarəti ələ keçirdiyini, habelə bölgədəki Amerika bazalarını “məhv etdiyini” bildirən Xamenei deyib: “Bu cür hücumlar təkrarlanarsa, İranın cavabı daha geniş ölçülərə çatacaq”.

Xamenei, həmçinin İranın regionda dəstəklədiyi və “müqavimət cəbhəsi” adlandırdığı silahlı qrupların mövqeyini təqdir edib.