Aprelin 4-də Türkiyənin ilk yerli elektromobili “Togg” Azərbaycan Respublikasının Prezidenti İlham Əliyevə təqdim olunub.
Senzor.az xəbər verir ki, dövlətimizin başçısı əvvəlcə Türkiyənin sənaye və texnologiya naziri Mustafa Varank, “Togg” şirkətinin baş icraçı direktoru və idarə heyətinin üzvləri ilə görüşdü.
Prezident İlham Əliyev: Bir daha salaməleyküm.
Mustafa Varank: Hörmətli cənab Prezidentim, xoş gəldiniz.
Prezident İlham Əliyev: Xoş gördük.
Türkiyə Palatalar və Birjalar Birliyinin rəhbəri Rifat Hisarcıklıoğlu: Salaməleyküm, cənab Prezidentim, necəsiniz?
Prezident İlham Əliyev: Salam, xoş gördük. Sizi gözləyirdik.
Rıfat Hisarcıklıoğlu: Allah razı olsun. Cənab Prezidentim, gödəkçəni geyinərsinizmi?
Prezident İlham Əliyev: Təbii ki, geyinərəm.
Rifat Hisarcıklıoğlu: Ölçünü də tam tutdurmuşuq. Cənab Prezidentim, buranı ilk dəfə görürəm. Mənzərə möhtəşəmdir.
Prezident İlham Əliyev: Bura Bakının ən gözəl, ən mənzərəli yeridir. Ona görə mən bu yeri seçdim.
Xatirə şəkilləri çəkdirildi.
Türkiyənin sənaye və texnologiya naziri Mustafa Varank “Togg” elektromobilinin T10X modelinin açarını dövlətimizin başçısına təqdim etdi.
Mustafa Varank: Hörmətli cənab Prezidentim, hörmətli Prezidentimizin salamlarını gətirdik.
Prezident İlham Əliyev: Əleykümsalam.
Mustafa Varank: Türkiyədən ikinci avtomobili Sizə təqdim etmiş oluruq. Bütün Türk xalqı ikinci avtomobilin Azərbaycana göndərilməsindən çox məmnundur. Xeyirli-uğurlu olsun. İnşallah, gözəl günlərdə istifadə edərsiniz.
Prezident İlham Əliyev: Çox sağ olun, təşəkkür edirəm. İlk növbədə, Əziz Qardaşım, hörmətli Prezident Rəcəb Tayyib Ərdoğana təşəkkürümü bildirirəm ki, ikinci avtomobilin mənə verilməsini tövsiyə edib. Sizə də təşəkkür edirəm, ilk növbədə, bu gözəl avtomobili istehsal etdiyiniz üçün. Bu, Türkiyənin, Türkiyə sənayesinin növbəti böyük bir uğurudur. Bu hədiyyəni mənə təqdim etdiyiniz üçün xüsusi təşəkkürümü bildirmək istəyirəm.
Mustafa Varank: Xeyirli olsun.
Sonra Prezident İlham Əliyevə xatirə hədiyyəsi təqdim olundu.
Dövlətimizin başçısı “Togg” elektromobilini idarə etdi.
Qeyd edək ki, 2022-ci il oktyabrın 29-da təqdimatı keçirilən Türkiyənin milli istehsalı olan “Togg” elektromobilinin ilk sifarişçilərindən biri də dövlətimizin başçısı olub. Ötən il noyabrın 2-də Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğan ilə telefon söhbəti zamanı dövlətimizin başçısı Türkiyənin mobillik sahəsində xidmət göstərən qlobal texnologiya markası “Togg”un kütləvi istehsala başlanılması münasibətilə təbriklərini çatdırıb və bunu Türkiyə sənayesinin yeni uğuru kimi dəyərləndirib. Türkiyə Prezident Rəcəb Tayyib Ərdoğan mətbuata açıqlamasında həmin telefon danışığı zamanı Azərbaycan Prezidenti İlham Əliyevin iki ədəd “Togg” elektromobili almaq üçün sifariş verdiyini bildirmişdi.
İlk avtomobil ötən gün Türkiyə Prezidenti Rəcəb Tayyib Ərdoğana və xanımı Əminə Ərdoğana təqdim olunub.
Xatırladaq ki, “Togg”un kütləvi istehsal zavodunun rəsmi açılış mərasimi ötən il oktyabrın 29-da keçirilib. Zavod Bursa vilayətinin Gemlik rayonunda inşa olunub. 2020-ci ildə təməli qoyulan zavodun inşası iki ilə tamamlanıb. Zavodun açılışı ilə yerli avtomobilin kütləvi istehsalı prosesi başlanıb. Tədbirdə iştirak edən Türkiyə Prezidenti Rəcəb Tayyib Ərdoğan “Togg” elektromobilini sınaqdan keçirib. Rəcəb Tayyib Ərdoğan bildirib ki, il ərzində 175 min avtomobil istehsal olunacaq, 2030-cu ilə qədər istehsal 1 milyonu ötəcək.
Qeyd edək ki, “Togg” elektromobilləri “Pamukkale”, “Anadolu”, “Gemlik”, “Kula”, “Oltu” və “Kapadokya” olmaqla altı rəngdə istehsal olunur. Avtomobil iki modifikasiyada - 200 və 400 at gücündə elektrik mühərriki ilə buraxılır. Ən güclü versiya 0-dan 100 kilometr-saat sürəti 4,8 saniyəyə yığa bilir. Elektromobilin maksimal gediş məsafəsi isə 500 kilometrə yaxındır. Avtomobillərin hazırlanması zamanı onların ətraf mühit üçün tam zərərsiz olmasına xüsusi diqqət yetirilib.
Türkiyənin 60 illik xəyalının reallaşması kimi qiymətləndirilən yerli avtomobil “Togg”un T10X modeli üçün sifariş hüququ qazanan 20 min əsas və 20 min ehtiyat qalibin siyahısı da artıq açıqlanıb. Püşkatma nəticəsində T10X modelini almaq hüququ qazanan şəxslərin siyahısı “Togg”un rəsmi internet saytında elan edilib. Bu modeli əvvəlcədən sifariş verən 177 min 467 nəfər arasında 20 min nəfər yerli avtomobil sahibi olub.
**16:36
Aprelin 4-də Türkiyənin ilk yerli elektromobili “Togg” Azərbaycan Respublikasının Prezidenti İlham Əliyevə təqdim olunub.
Senzor.az-ın xəbərinə görə, bu barədə məlumatı Azərbaycan Prezidentinin Mətbuat xidməti yayıb.
**15:30
Türkiyə istehsalı “Togg” elektromobili bir neçə saat sonra Azərbaycan Prezidenti İlham Əliyevə təhvil veriləcək.
Bunu Türkiyənin sənaye və texnologiya naziri Mustafa Varank deyib. O bildirib ki, "Anadolu" rəngli (red-qırmızı) “Togg”u Prezidenti İlham Əliyevə çatdırmaq üçün Azərbaycana gəlib.
Varank “Biz bu maşını Azərbaycana gətirməkdən, Türkiyənin avtomobilini cənab Prezident Əliyevə çatdırmaqdan qürur duyuruq",- deyə qeyd edib.
Türkiyədə Prezident Kompleksində keçirilən Togg T10X İlk Çatdırılma Mərasimindən sonra nazir Varank "Togg" nümayəndə heyəti ilə birlikdə Bakıya gedib. Nazir bir neçə saat sonra Prezident Əliyevin sifariş etdiyi maşını təhvil verəcəklərini qeyd edib:
"Bu, həqiqətən qürurverici bir layihədir. Türkiyədə böyük həvəs və həyəcan yaradan bir layihədir. Təbii ki, Azərbaycanda bu coşqu və həyəcanı görmək bizi sevindirir. Burada da azərbaycanlı qardaşlarımız nəqliyyat vasitəsi ilə bağlı suallar verirlər ki, bura gələcək, yoxsa ala bilərik? Əlbəttə, bu gün ilk təhvil-təslimatı Prezident Əliyevə etmək bizim üçün həqiqətən qürurvericidir”.
Türkiyəli nazirin sözlərinə görə prezident Rəcəb Tayyib Ərdoğandan sonra ikinci maşını kimin alacağı ilə bağlı müzakirələr gedirdi:
“Əslində cənab Əliyevin ikinci maşını alması bütün türk millətini qürurlandıran bir məsələdir. Ümid edirəm ki, bu cür əməkdaşlıqlarla yolumuza davam edəcəyik”.
Türkiyə mətbuatının məlumatına görə Bakı vaxtı ilə saat 14:00-da Azərbaycan Prezidenti İlham Əlivey tərəfindən qəbul ediləcək nazir Mustafa Varank və onu müşayiət edən şəxslər kütləvi istehsal xəttindən boşaldılan Anadolu rəngli “Togg”u Prezident Əliyevə təhvil verəcəklər.(AzVision.az)
