Ümumdünya Səhiyyə Təşkilatı (ÜST) Çinə koronavirusun mənşəyi haqqında tam məlumat əldə etmək üçün təzyiq göstərir.
Bu barədə Böyük Britaniyanın “Financial Times” qəzetinə müsahibəsində ÜST-nin baş direktoru Tedros Adanom Qebreyesus deyib.
“Biz Çinə [koronavirusun mənşəyinə dair məlumatlara] tam girişi təmin etmək üçün təzyiq edirik. Biz ölkələri Çin rəsmiləri ilə ikitərəfli görüşlərində bu məsələni qaldırmalarını xahiş edirik”, - o deyib.
ÜST-nin baş direktoru vurğulayıb ki, təşkilat koronavirusun səbəbləri ilə bağlı tam araşdırma aparmaq üçün Çinə “nümayəndə heyəti göndərmək istəyir”.
Qebreyesus qeyd edib ki, hazırda virusun yaranmasının bütün mümkün variantları, o cümlədən laboratoriya nəzəriyyəsi nəzərdən keçirilir.
“Aydın dəlil almayana qədər heç nə deyə bilmərik. Cavab alacağıq. Bu zaman məsələsidir”, - o diqqətə çatdırıb. ÜST-nin baş direktoru söyləyib ki, COVID-19-un mənşəyinin səbəblərini anlamaq növbəti pandemiyanın qarşısını almağa kömək edəcək.
