Gəncə Şəhər Baş Polis İdarəsi Dövlət Yol Polisi Şöbəsinin (DYPŞ) əməkdaşları şəhər ərazisində avtoxuliqanlıq edərək ictimai-asayişi nümayişkəranə şəkildə pozan və bununla da vətəndaşların haqlı narazılığına səbəb olan sürücünü saxlayıblar.Senzor.az bildirir ki, bu barədə Daxili İşlər Nazirliyi Mətbuat Xidmətinin Gəncə şəhərindəki regional qrupundan məlumat verilib.
Məlumata görə, Samux rayon sakini Mirzə Rzayev 8 noyabr Zəfər Günündə qohumuna məxsus “VAZ 2106” markalı avtomobillə yollarda intizamsızlıq edərək yol hərəkəti qaydalarını kobud şəkildə pozub, avtoxuliqanlıq edərək yol nəqliyyat-hadisəsi törədib, hadisə yerindənn yayınıb və həmin hərəkətləri sosial şəbəkələrdə paylaşıb.
Həmin şəxs barəsində DYPŞ-də inzibati qaydada protokollar tərtib edilərək baxılması üçün məhkəməyə göndərilib. Məhkəmənin qərarı ilə M.Rzayevə 1 il müddətinə sürücülük hüququndan məhrum edilməklə, 30 sutkalıq inzibati həbs cəzası verilib.
