Avqustun 20-si saat 23 radələrində Sabirabad rayonu, Əsgərbəyli kəndi ərazisində üç nəfər şəxsin ölməsi barədə rayon prokurorluğuna məlumat daxil olub.
Senzor.az-ın Sabirabad Rayon Prokurorluğuna istinadən məlumatına görə, aparılmış araşdırmalarla müəyyən edilib ki, Bəylər kənd sakini, 1963-cü il təvəllüdlü Nizami Məhərrəmov 10-15 gün öncə arvadı - 1976-cı il təvəllüdlü Ruhiyyə Məhərrəmovanın öz atası evinə getməsinə qəzəblənərək qeyd edilən tarixdə qayınatası, 1936-cı il təvəllüdlü Əmirxan Əflatunovun rayonun Əsgərbəyli kəndində yerləşən evinə gələrək sonuncuları qoşalüləli ov tüfəngindən atəş açaraq öldürdükdən sonra elə həmin tüfənglə ürək nahiyəsinə atəş açaraq özünü də öldürüb.
Faktla bağlı Sabirabad Rayon Prokurorluğunda Cinayət Məcəlləsinin 120.2.7 (iki və ya daha çox şəxsi qəsdən öldürmə) və 125-ci (özünü öldürmə həddinə çatdırma) maddələri ilə cinayət işi başlanıb.
Hazırda istintaq davam edir.
