"Antalyaspor"un İsrail ordusuna dəstəyini bildirən yəhudi əsilli futbolçusu Saqiv Yehezkel Türkiyədən xaric edilib.
APA-nın xəbərinə görə, Türkiyə daxili işlər naziri Ali Yerlikaya bununla bağlı “X” sosial media hesabında paylaşım edib.
O qeyd edib ki, futbolçu yerli vaxtla saat 17:15-də ölkəni tərk edib:
“Bir daha qeyd etmək istərdim ki, Türkiyə hər zaman bütün məzlumların və Fələstin xalqının yanındadır”, - o qeyd edib.
***
Türkiyənin "Antalyaspor" klubunun israilli futbolçusu Saqiv Yehezkel ölkədən deportasiya olunacaq.
İsrail mətbuatı xəbər verir ki, yanvarın 14-də keçirilən oyunda qola imza atan israilli futbolçu bunu Qəzzada 101 gündür ki, HAMAS tərəfindən saxlanılan israilli girovlara həsr etdiyini bildirib.
Buna cavab olaraq futbolçu Antalyada saxlanılıb və istintaqa cəlb edilib.
Türkiyənin ədliyyə naziri Yılmaz Tunç Antalya Baş Prokurorluğunun Yehezkelə qarşı "ictimaiyyəti açıq şəkildə nifrət və düşmənçiliyə təhrik etmək" və "İsrailin Qəzzada həyata keçirdiyi qırğına dəstək" ittihamı ilə hüquqi araşdırma başlatdığını açıqlayıb.
Bugün səhər isə Türkiyə məhkəməsi tərəfindən futbolçu azadlığa buraxılıb və ölkədən deportasiya olunacaq.
Futbolçu bildirib ki, bu hadisədən sonra onun "Antalyaspor" ilə müqaviləsi dayandırılıb.
