Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin “Orta əsr Ağsu Şəhəri” Dövlət Tarix-Mədəniyyət Qoruğu Ağsu rayonunun Gəgəli bələdiyyəsi və "Miras" Mədəni İrsin Öyrənilməsinə Kömək İctimai Birliyi ilə birlikdə qoruq daxilindəki tarixi Cümə məscidində Qarabağ müharibəsi şəhidləri və qazilərinə həsr etdiyi “Zəfər qəhrəmanları” sərgisini keçən ilin 13 noyabrından ziyarətçilər üçün açıq elan edib.
“Orta əsr Ağsu Şəhəri” Dövlət Tarix-Mədəniyyət Qoruğundan senzor.az-a daxil olan press-relizdə deyilir ki, sərgidə Birinci və İkinci Qarabağ müharibəsinin şəhidləri və iştirakçılarına məxsus geyimlər, mülki və hərbi əşyalar, fotolar, sənədlər, medallar və s. eksponatlar nümayiş olunur.
Qeyd edilir ki, sərginin əsas hissəsini Ağsu rayonundan 44 günlük Vətən müharibəsində şəhid olmuş 34 nəfər hərbçimizin əşyaları, foto və sənədləri təşkil edir.
Həftənin hər günü ziyarətçilər üçün açıq olan sərgi ilə Ağsu, Bakı, Kürdəmir, Naxçıvan, Sumqayıt ictimaiyyətinin nümayəndələri, Ağsu, Şamaxı və Kürdəmirdən olan şəhid ailələri, Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin, Azərbaycan Respublikası Təhsil Nazirliyi, Fövqaladə Hallar Nazirliyi, Daxili İşlər Nazirliyinin əməkdaşları, ABŞ, Rusiya və Özbəkistandan qonaqlar, eləcə də Ağsu rayon ümumtəhsil məktəblərinin müəllim və şagirdləri və digərləri tanış olublar. 
"Zəfər Qəhrəmanları" sərgisi çərcivəsində orta məktəblər üçün hazırlanmış proqramlar: heykəltəraş Vüqar Quliyevin “Qarabağın tarixi abidələrini birlikdə quraq” ustad dərsi, sənətşünas Səma Alməmmədli və bələdçi Xoşqədəm Əkbərlinin “Zəfər rəsmləri” üzrə ustad dərsi, qoruğun əməkdaşı Şəlalə Osmanlının təqdimatı ilə “Zəfər qəhrəmanları” mövzusunda esse yarışması, bələdçi Bilal Əzizovun təqdimatı ilə “Zəfər qəhrəmanları” mövzusunda ingilis dilində esse hazırlanması və məktəblilərin öz yazılarını oxuyaraq videoçəkiliş etmələri, şəhid ailələri və qazilərin “Zəfər qəhrəmanları” mövzusunda məruzələrinin dinlənilməsi, debatda məktəblilərin suallarının cavablandırılması, “Xançoban” Musiqi Qrupunun rəhbəri, xanəndə Ruslan Adgözəlovun təqdimatı ilə muğam üzrə ustad dərsi, məktəblilərə “Xudayar təsnifi”nin incəlikləri barədə məlumat verilməsi, fotoqraf Anar Həbibovun məktəblilərə foto və videoçəkilişlər üzrə ustad dərsi, məktəblilərin qoruqda və sərgidə sərbəst şəkildə fotoçəkilişləri baş tutub. Sərgiyə indiyədək 1000 nəfərdən çox ziyarətçi gəlib. 
27 sentyabrdan başlayaraq qoruq əməkdaşları, bələdiyyə işçiləri və "MİRAS" İctimai Birliyinin üzvləri Ağsu şəhəri və kəndlərində, Bakı və Sumqayıt şəhərlərində yaşayan şəhid ailələri ilə görüşüb, onlardan övladları haqqında məlumat və material toplayıblar.
"Zəfər Qəhrəmanları" sərgisi 2022-ci ilin 31 yanvar tarixinədək ziyarətçilərin üzünə açıq olacaq.
