“Bakı Metropoliteni” QSC-nin sabiq sədri Tağı Əhmədov dəfn olunub.
Senzor.az bildirir ki, mərhum Novxanıdakı evində keçirilən vida mərasimindən sonra Əhmədli qəbiristanlığında torpağa tapşırılıb.
Həm vida, həm də dəfn mərasimində mərhumun yaxınları, “Bakı Metropoliteni”nin rəhbər şəxsləri, deputatlar, generallar, siyasətçilər, ictimaiyyət və media nümayəndələri iştirak ediblər.
Fotolar “Qafqazinfo”nun əməkdaşı Xəyal Vəlizadənindir
**10:00
"Bakı Metropoliteni" QSC-nin sabiq rəisi Tağı Əhmədovla vida mərasimi Novxanıdakı bağ evində keçiriləcək.
Senzor.az bildirir ki, mərhum saat 12:00-da Əhmədli qəbiristanlığında dəfn olunacaq.
Qeyd edək ki, Tağı Əhmədov oktyabrın 18-i axşam saatlarında vəfat edib.
**21:30(19.10.2024)
“Bakı Metropoliteni” QSC-nin sabiq rəisi Tağı Əhmədov 75 yaşında vəfat edib.
Senzor.az bildirir ki, bu barədə KİV-ə onun yaxınları məlumat veriblər.
T.Əhmədov uzun sürən xəstəlikdən sonra bu gün dünyasını dəyişib. Mərhum sabah dəfn olunacaq.
Xatırladaq ki, T.Əhmədov 1 fevral 1949-cu ildə Naxçıvan Muxtar Respublikasının Şahbuz rayonunun Yuxarı Remeşin (indiki Güney Qışlaq) kəndində anadan olub, 1965-ci ildə Naxçıvan Kənd Təsərrüfatı Texnikumunu, 1977-ci ildə Azərbaycan Politexnik İnstitutunu, 1987-ci ildə Azərbaycan İnşaat Mühəndisləri İnstitutunu bitirib.
T.Əhmədov 1965-ci ildən "Badamlı" zavodunda fəhlə, 1970-1994-cü illərdə Bakı Metropoliteninin tunel qurğuları və yol xidmətində tunel fəhləsi, böyük tunel ustası, distansiya rəisi, 1994-1998-ci illərdə tunel qurğuları xidmətinin rəisi, 1998–2014-cü illərdə Bakı Metropoliteninin rəisi vəzifələrində çalışıb, 2014-2022-ci illərdə hakim Yeni Azərbaycan Partiyası Yasamal rayonn təşkilatının sədr müavini, daha sonra sədri olub.
O, "Fəxri Dəmiryolçu", "Bakı meropoliteni veteranı" döş nişanları, "Şöhrət ordeni" və "Əməkdar mühəndis" fəxri adı və nişanı, ölkənin iqtisadi inkişafında xidmətlərinə və Azərbaycan elminə verdiyi töhfələrə görə akademik Yusif Məmmədəliyev adına medalla təltif olunub.
Allah rəhmət eləsin!
