Sumqayıtda 3 gün əvvəl döyülən qadın iyunun 20-də xəstəxanada ölüb.
"Report" xəbər verir ki, hadisə iyunun 17-də 4-cü məhəllədə qeydə alınıb. Belə ki, 1943-cü il təvəllüdlü Şərqiyyə İdiş qızı Həsənova yaşadığı binanın qarşısında döyülərək müxtəlif dərəcəli xəsarətlər alıb.
O, yaralı vəziyyətdə xəstəxanaya çatdırılsa da, həkimlərin səylərinə baxmayaraq, dünən tibb müəssisəsində vəfat edib.
Hadisəni törətməkdə şübhəli bilinən 1961-ci il təvəllüdlü Ramiz Əhməd oğlu Quliyev hüquq-mühafizə orqanlarının əməkdaşları tərəfindən saxlanılıb.
Faktla bağlı Sumqayıt Şəhər Prokurorluğunda araşdırma aparılır.
