Belarus Prezidenti Aleksandr Lukaşenko Kollektiv Təhlükəsizlik Müqaviləsi Təşkilatı (KTMT) sülhməramlılarının Qazaxıstan əməliyyatından danışıb.
Senzor.az yerli KİV-ə istinadən bildirir ki, o, şənbə günü missiyasını başa vurmuş Belarus sülhməramlı kontingenti ilə görüşdə maraqlı açıqlama ilə çıxış edib.
Lukaşenko deyib ki, KTMT-nin sülhməramlı əməliyyatı incəliklərinə qədər özü və Rusiya Prezidenti Vladimir Putin tərəfindən hazırlanıb.
“Şişirtmədən deyirəm: bütün bu əməliyyatlar detallarına qədər iki prezident - Rusiya və Belarus rəhbərləri tərəfindən bir saat ərzində hazırlanıb. Hər şey tərəddüdsüz, tez və qətiyyətlə edildi”, - Lukaşenko vurğulayıb.
O həmçinin qeyd edib ki, Qazaxıstandakı etiraz aksiyaları ilə Belarusda 2020-ci ildə baş verənlər arasında ümumi oxşarlıqlar görünür.
Hər iki aksiyanı müqayisə edən Belarus lideri bildirib ki, Qərb xüsusi xidmət orqanlarının müdaxiləsi olmasaydı, bu hadisələr də olmazdı: ““Bu hadisələrin arxasında dövlətlər dayanır. Xatırlayın, 2020-ci ilin avqustunda bu ölkələr – bilirsiniz kimlərin əli ilə - bizə gəlmişdilər. Əlbəttə, bütün qarışıqlıqları onların xüsusi xidmətləri yaradır. Amma burda onların buynuzlarını qırdıq”.
Lukaşenko onu da vurğulayıb ki, Belarus hadisələrindən sonra kollektiv Qərbin əsas işi öz məqsədlərini gizlətmək olub: “Xüsusi xidmətlər işlədi və heç kəs onların (bu işin arxasında olan dövlətlərin) fərqinə varmadı. Qazaxıstan kimi möhtəşəm dövlətdə o cür miqyaslı aksiyalar bir sutkada baş verdi?” O, Qazaxıstanda böyük transmilli şirkətlərin maraqlarının kəsişdiyinə xüsusi diqqət çəkib: “Buna görə də komanda verildi: “Tələsməyin, sakit olun, hər şey aydın olanda səhnəyə çıxacağıq” – mən kəşfiyyatımızın ilk gündəki məlumatından sitat gətirdim. Orda hər şey vardı. Qazaxıstan, Belarus kimi, açar məntəqədir: biz – Avropada, onlar – Mərkəzi Asiyada”.
Lukaşenko bildirib ki, Qazaxıstandan Rusiyanı “qızışdırmaq” mümkün idi; Əfqanıstan biabırçılığını (ABŞ-ın Əfqanıstanda uduzub çıxması – red.) kompensasiya etmək və nəinki Çinə, hətta bütün Asiyaya təsir etmək olardı: “Buna görə də stavka olduqca yüksək idi”.
Xatırladaq ki, KTMT Kollektiv Təhlükəsizlik Şurasının 2022-ci il yanvarın 6-da qəbul edilmiş qərarına uyğun olaraq, vəziyyəti sabitləşdirmək və normallaşdırmaq üçün Təşkilatın Kollektiv Sülhməramlı Qüvvələri məhdud müddətə Qazaxıstana göndərilmişdi. Qrupa Rusiya, Belarus, Ermənistan, Tacikistan və Qırğızıstan silahlı qüvvələrinin bölmələri daxil idi.
