ABŞ Prezidenti Cozef Bayden seçkilərdə geri çəkilirsə, ölkəni də idarə edə bilməz.
Senzor.az bildirir ki, bu barədə ABŞ-ın keçmiş lideri Donald Tramp “Truth” sosial şəbəkəsindəki səhifəsində yazıb.
“İndi ölkəmizi kim idarə edir? Co (Bayden-red.) harada olduğunu bilmir, ona görə də o, ölkəni idarə edə bilməz”, - Tramp qeyd edib.
Qeyd edək ki, iyulun 21-də Prezident Co Bayden prezident seçkilərindən çəkildiyini açıqlayıb və bunun partiya və ölkə üçün daha yaxşı olacağına əminliyini ifadə edib. O həmçinin prezidentlik müddətinin sonuna qədər səlahiyyətlərini icra edəcəyini, bundan sonra Demokratlar Partiyasından ABŞ lideri postuna namizəd kimi Kamala Harrisi dəstəkləyəcəyini bildirib.
Onu da xatırladaq ki, ABŞ-da prezident seçkiləri noyabrın 5-də keçiriləcək. Donald Trampın namizədliyi Respublikaçılar Partiyasının iyulun 15-də başlayan və 4 gün davam edən milli qurultayında təsdiqlənib. Qarşı tərəfdən namizədlə bağlı yekun qərar isə Demokrat Partiyasının avqustun 19-dan 22-dək Çikaqoda keçiriləcək qurultayında veriləcək.
