Sabah Rusiyanın Sankt-Peterburq şəhərində MDB dövlət başçılarının qeyri-rəsmi görüşü keçiriləcək.
Senzor.az yerli KİV-ə istinadən bildirir ki, bunu Rusiya Prezidenti Vladimir Putinin sözçüsü Dmitri Peskov deyib.
Onun sözlərinə görə, MDB dövlət başçıları yəqin ki, Vladimir Putini yubileyi münasibətilə təbrik edəcəklər: “Bir qayda olaraq, bunun üçün protokolda təbrik nəzərdə tutulmur. Və çox vaxt hədiyyələr protokollar vasitəsilə ötürülür. Təbii ki, MDB liderləri bir-birini illərdi tanıyır və insani olaraq, ad günü münasibətilə təbrik edəcəklər”.
Peskov həmçinin qeyd edib ki, cümə günü Prezident Putinin gərgin iş günü olacaq.
Xatırladaq ki, sabah - 7 oktyabr tarixi Rusiya Prezidenti Vladimir Putinin ad günüdür, onun 70 yaşı tamam olur.
Onu da qeyd edək ki, MDB 1991-ci ildə yaradılıb. Birliyə Azərbaycan, Rusiya, Belarus, Qazaxıstan, Qırğızıstan, Moldova, Tacikistan, Türkmənistan, Özbəkistan və Ermənistan daxildir.
