Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə qaz qovşağı ilə bağlı razılığa gəldiyini bildirib.
O qeyd edib ki, Avropa Rusiya qazından Türkiyə vasitəsilə istifadə edə bilər.
"İndi Avropa qarşıdan gələn qış dövründə özünü enerji ilə necə təmin edəcəyini düşünür. Allaha şükür ki, belə bir problemimiz yoxdur. Üstəlik, cənab Putinlə son görüşümüzdə Türkiyədə qaz qovşağının yaradılması ilə bağlı razılığa gəldik. Onun elan etdiyi kimi, Avropa Rusiya qazından Türkiyə vasitəsilə istifadə edə bilər”, - Türkiyə lideri deyib.
Bundan əvvəl Rusiya Prezidenti Vladimir Putin bildirib ki, Rusiya qaz tranzitini “Şimal axını”ndan Qara dəniz regionuna və Türkiyəyə daşıya bilər. Rusiya lideri bu ideyanı Türkiyə prezidenti Rəcəb Tayyib Ərdoğanla müzakirə edib. Onlar məsələni ətraflı və tez bir zamanda həll etməyi tapşırıblar.
