Azərbaycan Prezidenti İlham Əliyev Ermənistanın baş naziri Nikol Paşinyanla görüşməyin əleyhinə deyil.
Senzor.az bildirir ki, bunu Prezident İlham Əliyev Fransnanın “France 24” kanalına verdiyi müsahibəsində deyib.
Azərbaycan Prezidenti bəyan edib ki, müharibə bitib və bölgənin sabitliyə ehtiyacı var.
“Ötən həftə Azərbaycan və Ermənistan xarici işlər nazirlərinin Nyu -Yorkda baş tutan görüşü dialoqun bərpa oluna biləcəyinin və prosesin sülh yolu istiqamətində irəliləməsinin yaxşı göstəricisidir. Ümid edirəm ki, görüşlər Azərbaycanla Ermənistan arasında normallaşma prosesinin, Cənubi Qafqaz regionunda əməkdaşlığın başlanğıcı olacaq”, - deyə Azərbaycan lideri vurğulayıb.
Azərbaycan Prezidenti yanvar ayında Moskvada Rusiya Prezidenti Vladimir Putinin təşəbbüsü ilə Azərbaycan, Rusiya və Ermənistan liderlərinin üçtərəfli görüşündə Ermənistanın Baş naziri ilə görüşmək imkanı əldə etdiyini xatırladıb.
“Bu görüş postkonflikt sonrakı əməkdaşlığa həsr olunmuşdu. Pandemiya və digər səbəblərə görə görüşmək imkanımız (Ermənistanın baş naziri ilə - red.) olmadı. Azərbaycan heç vaxt yüksək səviyyədə dialoqdan imtina etməyib. Bu əlaqələr sualları aydınlaşdırmağa imkan verir. Bizim mövqeyimiz aydındır: münaqişə həll edilib, geriyə qayıtmağa ehtiyac yoxdur, gələcəyə baxmaq lazımdır ”, - deyə Azərbaycan Prezidenti bildirib.
Jurnalist ölkə başçısından Ermənistanın baş naziri ilə görüşməyə hazır olub-olmadığını soruşub.
Prezident İlham Əliyev isə cavabında bəyan edib ki, ATƏT-in Minsk Qrupu belə bir görüş təşkil etmək təşəbbüsü ilə çıxış edərsə, buna etiraz etməyəcək.
