Avropa İttifaqının Parlamenti noyabrın 23-də Strasburqda Rusiya Federasiyasının (RF) Ukraynaya qarşı hərbi təcavüzü ilə əlaqədar onun terrorçuluğa sponsorluq edən dövlət kimi tanınması haqqında qətnamə qəbul edib.
Senzor.az bildirir ki, Avropa Parlamentinin saytında yer alan məlumatda belə deyilir.
Məlumata görə, Avropa deputatları RF Prezidenti Vladimir Putini və Rusiya hökumətini beynəlxalq tribunal qarşısında məsuliyyətə cəlb etmək üçün zəmin hazırlamaq niyyətindədirlər.
Daxili işlər üzrə Avropa Komissarı İlva Yohansson 18 oktyabr 2022-ci il tarixində bildirib ki, Avropa İttifaqında üçüncü ölkənin terrorçuluğa sponsorluq edən dövlət kimi tanınması üçün hüquqi əsas yoxdur. Buna görə Avropa Parlamenti öz qətnaməsində Aİ-ni və ona daxil olan ölkələri terrorçuluğa sponsorluq edən dövlətləri və terrorçuluğa əl atan dövlətləri müəyyən etmək üçün hüquqi əsas işləyib hazırlamağa çağırıb.
Xatırladaq ki, bir müddət əvvəl ATƏT-in Parlament Assambleyası (PA) da Rusiya haqqında bənzər qətnamə qəbul edib.
