Ukrayna Silahlı Qüvvələri və müdafiə qüvvələrinin digər hissələri fevralın 24-dən sonra işğal olunmuş ərazilərin 40%-ni və Rusiya Federasiyasının işğal etdiyi bütün ərazilərin 28%-ni azad edib.

“İnterfaks”ın məlumatına görə, bunu Ukrayna Silahlı Qüvvələrinin Ali Baş Komandanı Valeri Zalujnı deyib.

“Sağ sahil Xerson vilayətinin azad edilməsi işğaldan azad olunmuş ərazilərin ümumi sahəsini demək olar ki, 40 min kv.km-ə çatdırıb”, - deyə o bildirib.

Artıq dərc edilmiş məlumatlara görə, bu gün Ukrayna ümumi uzunluğu 3786 km olan quru sektorunda düşmənin qarşısını almaqda davam edir. Qarşı tərəflə aktiv cəbhə xətti 1500 km-dir.