Sayif Əl-Adil “Əl-Qaidə” terror təşkilatının faktiki lideri olaraq tanındı. Bu haqda məlumat BMT-yə üzv dövlətlərin kəşfiyyat məlumatlarına əsaslanan yeni hesabatında öz əksini tapıb.
Prinsip etibarilə Əl-Adilin Birləşmiş Ştatların “Əl-Qaidə” lideri Ayman Əl-Zəvahirini Əfqanıstanın paytaxtı Kabildə hava hücumu zamanı öldürməsindən altı ay sonra terror qruplaşmasının rəhbərliyinə gətirildiyi məlum idi. Lakin bu informasiya bu günə qədər rəsmən təsdiqlənməmişdi.
Əl-Adil ilə bağlı ən diqqətçəkən məqam isə onun hazırda İranda olmasıdır.
Vaşinqtonun kabusu
Sayif Əl-Adil prinsip etibarilə sələfləri Ayman Əl-Zəvahiri və Üsamə bin Ladendən təhlükəli hesab edilir. Rəsmi Vaşinqton və Qərb agentləri uzun müddətdir ki, Əl-Adilə Əl-Zəvahirinin ehtimal varisi kimi baxıb. Onun hazırda “Əl-Qaidə” lideri olması ABŞ üçün heç də arzuolunan bir hal deyil.
Məsələ ondadır ki, Əl-Adil professional hərbçi, Misirin keçmiş xüsusi təyinatlılar zabitidir. Bundan başqa o, 1990-cı illərin əvvəlindən başlayaraq Əfqanıstan, Pakistan və Sudandakı döyüşçülərə hərbi və kəşfiyyat təlimləri verən komandanın üzvü olub.
Əl-Adili Vaşinqton üçün kabusa çevirən əsas məqam isə şübhəsiz, onun 1992-1994-cü illərdə Somalidə Moqadişoda ABŞ qüvvələrinə qarşı döyüşməsidir. Eyni zamanda “Əl-Qaidə”nin Misir qolu olan “Misir İslami Cihad”ın və somalililərin təlimlərinə yardım edən Əl-Adili ABŞ üçün çox təhlükəli hesab edilir.
“Əl-Qaidə”nin yeni liderinin qruplaşmanı İrandan idarə etməsi ABŞ üçün daha ciddi problemlər yarada bilər.
İrana hərbi müdaxilə
Sayif Əl-Adilin “Əl-Qaidə” terror təşkilatını İrandan idarə etməsi ABŞ-ın həm bu ölkəyə aviazərbələr endirməsi, həm də hərbi müdaxilə etməsi üçün əsas yaradır. Məsələ ondadır ki, 2001-ci il 11 sentyabr hücumlarından sonra Əfqanıstanda Taliban hökuməti “Əl-Qaidə” terror qrupuna sığınacaq verdi.
ABŞ isə ilk olaraq “Əl-Qaidə”nin Əfqanıstandakı təlim obyektlərini bombaladı. Daha sonra isə Vaşinqtonun Əfqanıstana müdaxiləsi və yerli əfqan qəbilələrinin dəstəyi ilə Taliban hakimiyyəti devrildi.
Mümkündür ki, ABŞ Əfqanıstan ssenarisini İranda tətbiq etmək istəyir. Əl-Adilin İranda olması Vaşinqtonun ilkin olaraq Əfqanıstandakı kimi İranın bir sıra strateji hədəflərinə zərbələr endirməsi ilə müşahidə edilə bilər. Mümkündür ki, Vaşinqton ilk olaraq Tehrandan Əl-Adilin ona verilməsini istəsin. Tehran bu istəyə mənfi cavab verəcəyi təqdirdə ABŞ İrana hərbi müdaxilə üçün ciddi əsas əldə etmiş olacaq.
Turan Rzayev,
politoloq
