Gürcüstanın Dövlət Təhlükəsizliyi Xidməti (DTX) dövlət çevrilişinə cəhdlə bağlı işi araşdırır.Senzor.az yerli KİV-ə istinadən bildirir ki, bu barədə DTX-nın mətbuat katibi məlumat yayıb.
Bildirilib ki, ölkənin sabiq prezident Mixail Saakaşvilinin tərəfdarları dövlət əleyhinə hərəkətlər həyata keçirmək niyyətində olublar.
Qeyd olunur ki, Saakaşvili xəstəxanaya və ya digər həbsxanaya köçürüləcəyi təqdirdə onun tərəfdarları yolları bağlamaq, xaos yaratmaq barədə düşünürlər.
DTX bu planların müzakirəsini sübut edən səsyazısı təqdim edib. Səsyazısının məhkəmənin qərarı ilə qeydə alındığı bildirilir.
Faktla bağlı dövlət çevrilişi, hakmiyyətin ələ keçirilməsinə yönələn hərəkətlər maddəsi üzrə istintaq aparılır.
Bu arada Gürcüstanın Ədliyyə Nazirliyi də məlumat yayıb və bildirib ki, qurum istənilən ssenariyə hazırdır, əgər zərrurət yaranarsa, eks-prezident Mixail Saakaşvilini klinikaya yerləşdirmək üçün helikopterdən istifadə ediləcək.Ancaq Nazirliyinin mətbuat katibi deyib ki, hələlik Saakaşvilinin xəstəxanaya yerləşdirilməsinə ehtiyac yoxdur: “Hazırda Saakaşvilinin həyat parametrləri normadadır və müalicəsinə davam edir”.
