İsrailin xarici işlər naziri Eli Koen ilk dəfə olaraq açıq şəkildə bəyan edib ki, İsrailin Azərbaycandakı səfirliyinə hücum cəhdinin arxasında İran dayanır.

Hazırda Serbiyada səfərdə olan israilli nazirin sözlərinə görə, Azərbaycanda ifşa olunan terror qruplaşması maliyyələşdirilib və İrandan təlimat alıb.

Koen Serbiyanı İran terror qruplaşmalarına qarşı hərəkət etməyə çağırıb: "Son günlər Azərbaycanda İsrailin Bakıdakı səfirliyinə, son aylarda isə Kipr və Yunanıstanda israillilərə və yəhudilərə hücum cəhdində  gördüyümüz kimi, İran terrorizmi qlobal təhlükədir. İranla yalnız birgə mübarizə nəticə verəcək və ona regional sabitliyin pozulmasını davam etdirməyə imkan verməyəcək".