Türkiyə ilə “Taliban” hərəkatı arasında danışıqlar aparılıb.
APA-nın verdiyi xəbərə görə, bu barədə Türkiyə Prezidenti Rəcəb Tayyib Ərdoğan Bosniya və Herseqovinaya səfərindən öncə jurnalistlərin suallarını cavablandırarkən bildirib.
Onun sözlərinə görə, “Taliban”la danışıqlar Türkiyənin Kabildəki səfirliyində baş tutub və 3,5 saat davam edib.
“Bizim kiminlə, harada və nə zaman danışıqlar aparmaq üçün kimsədən icazə almaq kimi bir öhdəliyimiz yoxdur. Hazırda Əfqanıstanda ciddi idarəçilik boşluğu var. Lazım gələrsə, danışıqlar apararıq. “Taliban”la Kabildəki səfirliyimizdə 3,5 saat davam edən danışıqlar aparılıb. Eyni zamanda, “Taliban”ın bizə Kabil hava limanı ilə bağlı təklifləri var. Bu məsələdə hələlik qəbul edilmiş bir qərar yoxdur”, - deyə Türkiyə dövlət başçısı vurğulayıb.
