Beynəlxalq Cinayət Məhkəməsinin (BCM) Benyamin Netanyahu barəsində həbs qərarı çıxarmasına baxmayaraq, İsrailin Baş naziri Macarıstana 4 günlük səfərə gedib.
Senzor.az İsrail mediasına istinadən bildirir ki, siyasi müşahidəçilər Benyamin Netanyahunun bu səfərinin Beynəlxalq Cinayət Məhkəməsinin onun barəsindəki həbs qərarından sonra ilk xarici səfəri olduğuna diqqət çəkirlər.
Səfər fonunda Macarıstanın Baş naziri Viktor Orban ölkəsinə gələcək İsrailin hökumət rəhbərinin həbs olunmayacağını açıqlamışdı.
Qeyd edək ki, Macarıstanın Beynəlxalq Cinayət Məhkəməsindən çıxmaq istədiyi ilə bağlı məlumat yayılıb.
Onu da xatırladaq ki, 2024-cü ilin noyabrında Beynəlxalq Cinayət Məhkəməsi İsrailin Baş nazirini Fələstin ərazilərində, o cümlədən Qəzza zolağında törətdiyi hərbi cinayətlərdə ittiham edərək, onun həbsinə order verib. ABŞ Prezidenti Donald Tramp isə məhkəmənin hərəkətlərinə cavab olaraq, 2025-ci ilin fevralında ABŞ və onun müttəfiqlərinin, o cümlədən İsrailin maraqlarını qorumaq zərurətini əsas gətirərək BCM-in özünə qarşı sanksiyaların tətbiqi haqqında sərəncam imzalayıb.
