Bakı Hərbi Məhkəməsində Müdafiə Nazirliyinin mənimsəmədə təqsirləndirilən zabitləri - Maliyyə İdarəsinin rəisi Rafael Xəlilov, N saylı hərbi hissənin maliyyə şöbəsinin rəisi Fəzail Əliyev, Quru Qoşunların maliyyə idarəsinin rəisi Bayram Bayramov və maliyyə idarəsinin zabiti Əlizadə Vüsal Ədalət oğlu barəsində istintaq orqanının təqdimatına baxılıb.
APA xəbər verir ki, təqdimat təmin edilib. Təqsirləndirilən şəxslərin hər biri barəsində 4 aylıq həbs qətimkan tədbiri seçilib.
Qeyd edək ki, adıçəkilən şəxslər respublika hüquq-mühafizə orqanları əməkdaşlarının keçirdikləri əməliyyat zamanı saxlanılıblar. Onlara Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham verilib.
Ümumi zərərin 10 milyon manatdan çox olduğu bildirilir.
**14:28
Dövlət Təhlükəsizliyi Xidməti (DTX) Müdafiə Nazirliyində əməliyyat keçirib.
“Qafqazinfo”nun əldə etdiyi məlumata, nazirliyin Maliyyə İdarəsinin şöbə rəisi, polkovnik Rafael Hafiz oğlu Xəlilov saxlanılıb.
Dünən Səbail rayon Məhkəməsində onun barəsində 4 aylıq həbs qətimkan tədbiri seçilib.
Polkovnik Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə təqsirləndirilir.
O, 9 milyon 650 min manat vəsaiti mənimsəməkdə ittiham olunur.
