Avropa İttifaqı (Aİ) ölkələri Ukraynaya vəd etdikləri döyüş təyyarələrini göndərməyəcəklər.Bu barədə “Politico” nəşri yazıb.
Belə ki, Polşa Ukraynaya döyüş təyyarələri göndərməyəcəyini bildirib. Polşa ilə yanaşı, Bolqarıstan və Slovakiya hökumətləri də Ukraynaya hərbi təyyarə göndərməyəcəyini bildiriblər.
Bolqarıstanın Baş naziri Kiril Petkov bildirib ki, onun ölkəsində istismara yararlı təyyarələr və ehtiyat hissələri yoxdur, həmçinin Ukraynaya təyyarələrin verilməsindən əlavə, ölkənin hava məkanını qorumaq üçün belə kifayət qədər qırıcı yoxdur.
Slovakiya Müdafiə Nazirliyinin sözçüsü də məlumatı təkzib edib: "Slovakiya Ukraynaya döyüş təyyarələri göndərməyəcək".
Eyni fikri Polşa Prezidenti Andjey Duda səsləndirib. Polşadakı Lask aviabazasında NATO-nun Baş katibi Yens Stoltenberqlə birgə çıxış edən A.Duda ölkəsinin "Ukraynaya heç bir təyyarə göndərmək niyyətində olmadığını" deyib və bunun "hərbi müdaxiləyə səbəb olacağını" iddia edib.
Xatırladaq ki, daha əvvəl Aİ-nin ayrı-ayrı ölkələrindən Ukraynaya qırıcılar göndəriləcəyi bildirilmişdi. Söhbət ukraynalı pilotların artıq idarə edə bildikləri MiQ-29 tipli reaktiv təyyarələrdən gedirdi.
