Xəbər verdiyimiz kimi, Rusiyanın məşhur media orqanlarının nümayəndələri - “Meduza”nın baş redaktoru İvan Kolpakov, “Dojd” telekanalının baş redaktoru Tixon Dzyadko, yazıçı-jurnalist Mixail Zıqar və “Kommersant”ın müxbiri Vladimir Solovyev Ukrayna Prezidenti Volodimir Zelenskidən video-formatda müsahibə alıblar. İki saat davam edən müsahibənin axşam saatlarında senzurasız yayılacağı gözlənilirdi. Amma...Senzor.az bildirir ki, Rusiyanın Rabitə, İnformasiya Texnologiyaları və Kütləvi İnformasiya Vasitələrinə Nəzarət Federal Xidməti (“Roskomnadzor”) həmin müsahibəni yaymamağı tələb edib.
Qurumun bununla bağlı yaydığı press-relizdə deyilir: ““Roskomnadzor” Rusiya KİV-inə sözügedən müsahibəni yaymamaq barədə xəbərdarlıq edir”.
Məlumatda həmçinin müsahibə götürən KİV nümayəndələri ilə bağlı araşdırma başlanıldığı və lazımı tədbirlər görüləcəyi bildirilib.
Maraqlıdır ki, “Roskomnadzor”un ardınca Rusiya Baş Prokurorluğu Ukrayna lideri Volodimir Zelenskinin Rusiya mediasında yayılan sitatlarını qiymətləndirmək niyyətində olduğunu bildirib.
Zelenskinin Ofisi isə “Roskomnadzor”un yayılmasını qadağan etdiyi müsahibənin videosunu artıq sosial şəbəkələrdə paylaşıb.
