Fövqəladə Hallar Nazirliyi (FHN) tərəfindən görülən operativ və təxirəsalınmaz tədbirlər sayəsində Sumqayıt şəhərinin Hacı Zeynalabdin qəsəbəsində yerləşən "Azərsun Sənaye Parkı”nın ərazisində baş vermiş yanğın saat 08:24-də söndürülüb.Senzor.az bildirir ki, bu barədə FHN-dən məlumat verilib.
Bildirilib ki, hazırda ərazidə konstruksiyaların söküntüsü və müvafiq tədbirlər görülür. Hadisə nəticəsində xəsarət alan olmayıb.
FHN-in və Baş Prokurorluğun müstəntiqlərindən ibarət yaradılan istintaq qrupu tərəfindən hadisənin başvermə səbəbləri araşdırılır. Araşdırmanın nəticələri barədə ictimaiyyətə əlavə məlumat veriləcək.
Qeyd edək ki, hadisə yerində olan fövqəladə hallar naziri general-polkovnik Kəmaləddin Heydərov yanğın söndürülməmişdən bir az əvvəl jurnalistlərə açıqlamasında demişdi ki, heç bir ekoloji problem yaranmayıb: “Fövqəladə Hallar Nazirliyinin laboratoriyası bir neçə saat əvvəl mütəmadi olaraq cihazlarla, habelə Ekologiya və Təbii Sərvətlər Nazirliyinin cihazları ilə birgə araşdırma aparıb. Havada heç bir ciddi zərər müşahidə olunmayıb".
Senzor.az
