Türkiyə və Azərbaycan arasında hərbi sahədə qarşılıqlı əlaqəni təmin etmək, təlim planlaşdırma, idarəetmə və icra prinsiplərini uyğunlaşdırmaq üçün “Qardaş Briqada” layihəsi başladılıb.
Senzor.az bildirir ki, bu barədə Türkiyə Milli Müdafiə Nazirliyinin rəsmisi Pinar Kara açıqlama verib.
Açıqlamada deyilir: "Türkiyə Azərbaycan Ordusuna dəstək olmaq məqsədilə Ermənistanın işğalından azad edilmiş ərazilərdə minatəmizləmə işlərini davam etdirir. Türkiyə Silahlı Qüvvələri qardaş ölkə Azərbaycanla hərbi əməkdaşlıq müqavilələri çərçivəsində Azərbaycan Silahlı Qüvvələrinin modernləşdirilməsi və təlim fəaliyyətini dəstəkləməyə davam edir".
Açıqlamada daha sonra qeyd olunur ki, hazırda Azərbaycan Silahlı Qüvvələrinin şəxsi heyəti ilə birlikdə Türkiyə Silahlı Qüvvələrinin orqanı daxilində birgə təlimlər və təlim fəaliyyətləri həyata keçirilir:
"İki dövlət, bir millət" anlayışı ilə kədər və sevinc içərisində bir yerdə olduğumuz azərbaycanlı qardaşlarımızın yanında bütün imkanlarımızla olmağa davam edəcəyik".
