Xəzər dənizinin Azərbaycan sektorunda aparılan ərazi kəşfiyyatı zamanı suyun 60 metrədək dərinliyində aşkar edilən 6 ədəd böyük gəmi minasının (КБ-1) zərərsizləşdirilməsi prosesi mayın 10-da uğurla başa çatıb.Senzor.az bildirir ki, bu barədə Müdafiə Nazirliyindən məlumat verilib.
Hərbi Dəniz Qüvvələrinin aidiyyəti üzrə gəmiləri və ixtisaslaşdırılmış mütəxəssisləri tərəfindən minalar təhlükəsizlik tədbirlərinə əməl edilməklə digər dövlət qurumları ilə qarşılıqlı əlaqədə zərərsizləşdirilib.
Minaların zərərsizləşdirilməsi prosesinə ümumilikdə 4 hərbi gəmi, 4 kater və 133 nəfər hərbi qulluqçu cəlb olunub.
Hazırda Xəzər dənizinin Azərbaycan sektorunda bütün fəaliyyətlər adi qaydada davam etdirilir.
Sovet istehsalı olan bu minaların aşkarlandığı dəqiq yer açıqlanmır.
Xatırladaq ki, minalar mayın 4-də "UMİD BABEK OPERATİNG COMPANY" şirkətinin Xəzər dənizinin Azərbaycan sektorunda həyata keçirdiyi kəşfiyyat işləri zamanı aşkarlanmışdı.
Minalar sovet dövründə minalanma standartlarına riayət edilmədən suya atılıb.
