Azərbaycan və Türkiyə Silahlı Qüvvələrinin Laçında başlatdıqları hərbi təlimin yeni məramları ortaya çıxır.
Ovqat.com-un məlumatına görə, hakimiyyətə yaxın Beynəlxalq Münasibətlərin Təhlili Mərkəzinin (BMTM) sədri Fərid Şəfiyev “Azadlıq” radiosuna verdiyi açıqlamasında rəsmi Bakının indiyədək rus “sülhməramlı”larına mandat verməməsinin səbəbinə aydınlıq gətirib.
BMTM sədri bildirib ki, Rusiya Laçın dəhlizini Azərbaycanın suveren ərazisi kimi tanımaq istəmir, bu da istər-istəməz tərəflərin ümumi razılığa gəlməsinə imkan vermir: "Burada söhbət Laçın dəhlizi və beynəlxalq təşkilatların Azərbayacanın suveren ərazilərində fəaliyyətindən və bir sıra başqa məsələlərdən gedir. Məndə olan məlumata əsasən deyə bilərəm ki, Rusiya bu təklifləri qəbul eləmir”.
F.Şəfiyevin fikrindən belə anlaşılır ki, 10 aydır davam edər müzakirələrdən hələ bir nəticə hasil olmayıb.
Son zamanlar Rusiyanın açıq-aşkar Ermənistanı dəstəkləməsi, “sülhməramlı” kontingentin komandiri Rüstəm Muradovun düşmən dövlətin müdafiə naziri qarşısında Qarabağla bağlı hesabat verməsi də deyilənləri təsdiqləyir. Rusiyanın ATƏT-in Minsk qrupundakı yeni həmsədrinin İrəvana səfər etməsi də rəsmi Bakının Qarabağ üzərindəki suverenlik iddialarına qarşı çıxmaqdan başqa bir şey deyil. Bundan əvvəl isə Rusiyanın Ermənistan ordusunu yenidən silahlandırması barədə qərar qəbul etməsi, ölkənin xarici işlər naziri Sergey Lavrovun Azərbaycanın suverenliyi əleyhinə verdiyi açıqlamalar da müzakirələrin dalana dirənməsindən xəbər verir. Üstəlik, Rusiya açıq-aşkar təhdidedici mesajlarla Azərbaycana təzyiq göstərir.
Görünür, bıçağın sümüyə dirəndiyini nəzərə alan Azərbaycan və Türkiyə də Laçında hərbi təlimlər keçirərək, Rusiyanın bu təzyiqlərinə cavab verirlər. Mesaj isə “Azərbaycanın suverenlik haqları danışıq mövzusu olarsa, Laçın uğrunda yenidən müharibəyə başlaya bilərik” fikrini ehtiva edir.
Xatırladaq ki, ötən il 44 günlük müharibədən əvvəl də Azərbaycan və Türkiyə hərbi təlimlər keçirmiş və müxtəlif manevrlərlə İrəvana bəzi mesajlar vermişdilər. Bu mesajı doğru anlamayan İrəvan Azərbaycana hücumla cavab verincə isə döyüş qaçılmaz olmuşdu.
Laçında keçirilən son təlimlər də antiterror əməliyyatına başlamaq planının tərkib hissəsi ola bilər...
