Ukrayna Prezidenti Volodimir Zelenski Kiyevdə Almaniya Kansleri Olaf Şolts, Fransa Prezidenti Emmanuel Makron, İtaliyanın Baş naziri Mario Draqi və Rumıniya Prezidenti Klaus İohannis ilə görüşüb.

Senzor.az bildirir ki, bu barədə UNİAN məlumat yayıb. 

“Dörd liderin Kiyevə bu səfəri və danışıqlarımız bir daha sübut etdi ki, bizim əsas gücümüz və ən səmərəli silahımız birlikdir”, - deyə Zelenski bildirib.

Onun sözlərinə görə, görüş zamanı tərəflər aşağıdakıları müzakirə ediblər:

-Ukraynanın müdafiəsinin davam etdirilməsi və gücləndirilməsi;

-Ukraynanın iqtisadi dəstəyinə və müharibədən sonrakı bərpasına tərəflərin yanaşmasının əlaqələndirilməsi;

-Rusiyanın səbəb olduğu ərzaq böhranına qarşı;

-Rusiyaya qarşı gələcək sanksiyalar.

Görüşdə həmçinin Avropanın gələcəyi və Ukraynanın Avrointeqrasiya məsələlərinə mühüm diqqət yetirilib.

Zelenski, öz növbəsində, müdafiə üçün prioritet ehtiyacları qeyd edib.

Məlumata görə, Ukraynaya ilk növbədə ağır silahlar, müasir raket artilleriyası və raket əleyhinə müdafiə sistemlərinin göndərilməsi gözlənilir.

Bu arada RBK-Ukrayna Prezident  V.Zelenskinin maraqlı bir açıqlamasına diqqət çəkib. 

Zelenski qeyd edib ki, Rusiya prezidenti Vladimir Putin qərar verməzdən əvvəl onun nəticələrini düşünmür: “Rusiya Federasiyası Prezidentinin nəsə eşitməyə hazır olduğuna əmin deyiləm, mənə elə gəlir ki, o, qərar qəbul edən və sonra kiminləsə danışan mərhələdədir.

Qərarlar məhz bu ardıcıllıqla verilir: müzakirə etməmək, əvvəlcə hərəkətə keçmək, sonra isə düşünmək. Bu qaydada müharibəni bitirmək və ya müharibəni bitirmək istəmək mümkün deyil”.

Ukrayna liderinin sözlərinə görə, indi dünyada elə bir lider yoxdur ki, Putinlə fikir mübadiləsi aparıb onu müharibəni dayandırmağa məcbur etsin: "Rusiya Federasiyasını yalnız kollektiv güclü qüvvə dayandıracaq".