Gürcüstanda saxlanılan keçmiş prezident Mixail Saakaşvili ölkədə keçirilən seçkilərin nəticəsindən məmnun olduğunu bildirib.Bunu jurnalistlərə Gürcüstanın Vahid Milli Hərəkat Partiyasının üzvü Yekaterina Xerxeulidze deyib.
"Ona xəbər verdiyim nəticələrdən çox məmnun qaldı. Tiflisdəki nəticələr onu xüsusilə təsirləndirdi. Şantaj və rüşvət fonunda gürcü xalqının hansı mübarizədən keçdiyini, hansı təzyiq altında seçim etməli olduğunu başa düşür", - deyə o bildirib.
Axar.az xatırladır ki, ötən gün Gürcüstanda yerli özünüidarə orqanlarına seçki keçirilib. MSK-nın məlumatına əsasən, proporsional siyahılara görə “Gürcü Arzusu” seçicilərin 46,65%, Vahid Milli Hərəkat isə 30,7%-inin səsini alıb.
Heç kimin qalib gəlmədiyi Tiflis meri uğrunda seçkilərin ikinci turu isə 30 oktyabrda keçiriləcək.
