"Telegram" messencerinin həmtəsisçisi Pavel Durov 2024-cü il iyulun 8-də başlayan istintaq çərçivəsində Fransada saxlanılıb.

Senzor.az yerli KİV-ə istinadən bildirir ki, Paris prokurorluğunun yaydığı növbəti  məlumatda belə deyilir.

“Bu tədbir 2024-cü il iyulun 8-də Paris prokurorluğunun kibercinayətkarlıqla mübarizə şöbəsinin təşəbbüsü ilə aparılan istintaqa qədərki yoxlamanın nəticələrinə əsasən başlanmış ibtidai istintaqın tərkib hissəsidir”, - mətndə qeyd olunur.

Qurumdan verilən məlumata görə, müstəntiqlərin tələbi ilə istintaqa Rəqəmsal Cinayət Mərkəzi və Milli Fırıldaqçılıq İdarəsi də cəlb olunub.

O da bildirilib ki, Pavel Durov 12 cinayətdə ittiham olunur. Həmin cinayətlərin bəziləri aşağıdakılardır:

- mütəşəkkil qrupların qanunsuz əməliyyatlarının aparılması üçün onlayn platformanın idarə edilməsində iştirak;

- hüquq-mühafizə orqanlarının tələbi ilə ibtidai araşdırmanın aparılması və istifadəsi üçün zəruri olan məlumatları və ya sənədləri verməkdən imtina;

- yetkinlik yaşına çatmayanlarla pornoqrafik məzmunun saxlanmasında iştirak;

- narkotiklərin yayılmasında iştirak;

- kibercinayətlərdə iştirak;

- mütəşəkkil cinayətkar qrupların tərkibində dələduzluqda iştirak.

Xatırladaq ki, Pavel Durovun Fransada uzadılmış həbs müddəti avqustun 28-də başa çatır.