Sabiq deputat Hüseyn Abdullayevin məhkəməsinin növbəti iclası keçirilib.
Bakı Ağır Cinayətlər Məhkəməsində hakim Azər Tağıyevin sədrliyi ilə keçirilən prosesdə Hüseyn Abdullayev iclasa onlayn qoşulub.
Onun vəkili Ceyhun Yusifov müdafiə etdiyi şəxsin səhhəti ilə əlaqədər olaraq ATU-nun professoru Adil Qeybullanın müalicə məntəqəsinə dəvət edilməsi ilə bağlı vəsatət qaldırıb: “Müdafiə etdiyim şəxsin vəziyyəti ağırdır. O, çəki itirib. Onun müalicə mərkəzində müalicəsinin davam etdirilməsi ilə bağlı vəsatət bundan öncəki prosesdə təmin edilmədi. Lakin bizə bildirdilər ki, məhkəmə icazə versə, bura müayinə üçün həkim gələ bilər. Bu hal yaşanıb. Sadəcə məhkəmənin icazəsi lazımdır”.
Professor Adil Qeybullanın dəvət edilməsi vəsatətinə dövlət ittihamçısı etiraz etsə də, məhkəmə vəsatəti təmin edib.
Prokuror ittiham aktını oxuyub.Təqsirləndirilən şəxs ittiham aktı ilə razılaşmayıb və özünü təqsirli hesab etməyib.
Hakim Azər Tağıyev cinayət işi sübuta yetirildiyi halda, ona 7 ildən 12 ilədək həbs cəzası veriləcəyini nəzərə çatdırıb.
Daha sonra H.Abdullayev istintaqa verdiyi ifadəni təsdiq edib.
“Report” xatırladır ki, sabiq deputata hədə-qorxu ilə tələb etmə, qanunsuz sahibkarlıq, cinayət yolu ilə əldə edilmiş pul vəsaitlərini və ya digər əmlakı leqallaşdırma və digər əməllərlə bağlı ittiham verilib.
Həbs müddətinin bitməsinə az qalmış onun barəsində yenidən cinayət işi başlanılıb.
İstintaqla Hüseyn Abdullayevin bilə-bilə cinayət yolu ilə əldə etdiyi əmlakın həqiqi mənbəyini gizlətmək məqsədi ilə özünün və ailə üzvlərinin adlarına ölkəmizdə fəaliyyət göstərən banklarda açılmış 7 bank hesabı vasitəsi ilə ümumilikdə 5.5 milyon manatdan artıq pul vəsaitini müxtəlif fiziki və hüquqi şəxslərin Azərbaycan Respublikası və xarici ölkələrdəki bank hesablarına köçürməklə, konvertasiya əməliyyatlarını həyata keçirməklə, habelə qanunsuz əqdlər bağlamaqla yaxın qohumunun adına Azərbaycan Respublikası ərazisində daşınmaz əmlaklar alaraq həmin məbləğdə pul vəsaitini leqallaşdırmasına əsaslı şübhələr müəyyən edilib.
