ABŞ prezidentliyinə namizəd Kamala Harris səsvermə öncəsi ermənilərə müraciət edib.
Senzor.az yerli KİV-ə istinadən bildirir ki, K.Harris müracətində Qarabağ ermənilərinin hüquqlarının qorunmasının vacibliyini qeyd edib, Ermənistanın qonşuları ilə normal münasibətlər qurması üçün səylərini artıracağını vurğulayıb. 
"Mən Ermənistanı demokratiyanın möhkəmləndirilməsi və regionda sabitliyin təşviqi səylərində dəstəkləməyə davam edəcəyəm", - deyə Kamala Harris müracətində vurğulayıb.
Yeri gəlmişkən, Qərbi Azərbaycan İcması ABŞ-ın hazırkı vitse-prezidenti və qarşıdakı seçkilərdə demokratların prezidentliyə namizədi Kamala Harrisin Amerikanın erməni icmasına ünvanlandığı müraciətlə bağlı bəyanat yayıb.
Bəyanatda bildirilir ki, ABŞ-ın vitse-prezidenti Kamala Harris prezidentliyə namizəd qismində Amerikanın erməni icmasına ünvanlandığı müraciətdə “Dağlıq Qarabağ”dan olan ermənilərin qayıtmaq hüququna istinad edib: "İlk növbədə, qeyd edək ki, Azərbaycanda “Dağlıq Qarabağ” adlı bölgə yoxdur. Separatçılıq və işğalla assosiasiya olunan bu terminin işlədilməsi Azərbaycanın ərazi bütövlüyünə və suverenliyinə hörmətsizlikdir. 
Bundan əlavə, ABŞ vitse-prezidentinin qayıdış hüququna yalnız etnik ermənilər üçün istinad etməsi ayrı-seçkilik xarakteri daşıyır. Qərbi Azərbaycandan qovulmuş azərbaycanlıların öz evlərinə qayıtmaq hüququ ədalətin və davamlı sülhün bərqərar olunması üçün zəruri şərtdir. Vitse-prezidentin Qərbi azərbaycanlıların qayıdış hüququnu görməzdən gəlməsi sülhə kömək etmir və yanlışdır.
Biz vitse-prezident Harrisə müraciət edərək, onu Qərbi azərbaycanlıların təhlükəsiz və ləyaqətli şəkildə öz evlərinə qayıtmaq hüququna hörmət etməyə və qayıdış hüququ məsələsində etnik və ya dini mənsubiyyətə əsaslanan ayrı-seçkiliyə yol verməməyə çağırırıq".
