Fransanın "Arte" telekanalında yəhudi dövlətinin ifrat sağçı maliyyə naziri Bezalel Smotriçin müsahibəsinin yer aldığı "İsraildə: xaos nazirləri" adlı sənədli film nümayiş olunub.

Senzor.az Haqqin.az-a istinadən bildirir ki, müsahibə əsnasında israilli nazir “Böyük İsrail” və onun sərhədləri ilə bağlı baxışlarından danışarkən gözlənilməz açıqlamalar verib. 

Smotriç bildirib ki, İsrail "hissə-hissə" genişlənəcək və nəticədə bütün Fələstin ərazilərini, həmçinin İordaniya, Livan, Misir, Suriya, İraq və Səudiyyə Ərəbistanını əhatə edəcək.

“Mən yəhudi dövləti istəyirəm. Yəhudi xalqının dəyərlərinə uyğun fəaliyyət göstərən bir dövlət. Biz İsrailin ərazisini hissə-hissə genişləndirmək istəyirik. Qüdsün gələcəkdə Dəməşqə qədər genişlənməli olduğu yazılıb”, - deyə o, dövlətin bütün Yaxın Şərqdə genişlənməsini nəzərdə tutan “Böyük İsrail” ideologiyasına istinad edərək bildirib.

İordaniyanın Xarici İşlər Nazirliyi israilli naziri sözlərinə görə qınayıb və bildirib ki, Smotriçin dedikləri onun müdafiə etdiyi təhlükəli və “irqçi” ideologiyaya əsaslanır.

Senzor.az