Xalq artisti Ağadadaş Ağayevin cinayət işi üzrə məhkəmə istintaqı tamamlanıb.

Binəqədi Rayon Məhkəməsində keçirilən iclasda prokuror ittiham nitqi ilə çıxış edib.

Prokuror bəyan edib ki, müttəhim müğənniyə verilmiş ittiham məhkəmə istintaqı ilə də təsdiqini tapıb.

Bu əsasla Ağadadaş Ağayev xuliqanlıqda təqsirli bilinərək ona 2 il azadlıqdan məhrumetmə cəzası təyin edilməli, Cinayət Məcəlləsinin 70-ci (şərti məhkum etmə) maddəsi tətbiq edilməklə həmin cəza şərti hesab olunmalıdır.

Hakim müğənninin vəkili Asim Abbasova müdafiə çıxışına hazırlaşması üçün vaxt verib.

Qeyd edək ki, az sonra başqa zalda insidentin digər iştirakçısı olan mühafizəçi Nurəddin Cəlilovun məhkəməsi keçirilib. O da xuliqanlıqda ittiham edilir. Həmin işdə Ağadadaş Ağayev zərərçəkmişdir.

Nurəddin Cəlilovun da məhkəmə istintaqı tamamlanıb. Prokuror onun 2 il 6 ay müddətə şərti məhkum edilməsini istəyib.

“Qafqazinfo” xatırladır ki, Ağadadaş Ağayevlə balta atdığı mühafizəçi arasında notarial qaydada barışıq əldə olunub.