Türkiyənin Cümhuriyyət Xalq Partiyası (CHP) aprelin 6-da fövqəladə qurultaya gedəcək.
Senzor.az yerli KİV-ə istinadən bildirir ki, bunu CHP sədri sədri Özgür Özəl deyib.
“Aprelin 6-da CHP-nin nümayəndələri fövqəladə qurultayda Atatürkün qurduğu partiyaya qəyyum təyin etməyə belə cəhd edənlərə inad iradələrini bildirəcəklər”, – o qeyd edib.
Özəl vurğulayıb ki, partiya qarşıdan gələn partiyadaxili seçkilərə (praymeriz) əngəl olmaq cəhdləri ilə üzləşib: “Biz bazar günü (martın 23-də – red.) keçiriləcək seçkiləri pozmaq üçün CHP-yə qəyyum (xarici idarəçi – red.) təyin etmək üçün yeni bir cəhd gördük. Lakin səlahiyyətlərimdən istifadə edərək 15 gün sonra – 6 apreldə fövqəladə qurultay keçirmək qərarına gəldim. Bu, partiya üzərində xarici nəzarətin təyin edilməsi planlarının həyata keçirilməsinə imkan verməyəcək”.
Bundan başqa, Özəl fövqəladə qurultayda partiya sədri seçkilərində özünün də iştirak edəcəyini təsdiqləyib: “İstəyən hər kəs namizədliyini irəli sürə bilər. Bu, demokratik bir yarış olacaq. Amma mən də seçkilərə gedirəm”.
Xatırladaq ki, PKK ilə əlaqələr və korrupsiya işi ilə bağlı araşdırma çərçivəsində İstanbulda yüzə yaxın insan, o cümlədən meriya və bələdiyyə nümayəndələri saxlanılıb. İstanbulun meri Əkrəm İmamoğlu istintaq hərəkətləri üçün İstanbul Təhlükəsizlik İdarəsinə aparılıb.
İstanbul valiliyinin qərarı ilə martın 23-dək şəhərdə mitinq və nümayişlərin, eləcə də hər hansı yürüş və mətbuat üçün açıq bəyanatların keçirilməsi qadağan edilib.
