Türkiyə Prezidenti Rəcəb Tayyib Ərdoğan sentyabrın 18-də Böyük Britaniyaya səfər edə bilər. Ərdoğan bildirib ki, əgər proqramı uyğun olsa o, Britaniya Kraliçası II Elizabetin dəfn mərasimində iştirak edəcək. 

Böyük ehtimalla, Ərdoğan Britaniyaya gedəcək. Səfərin dəqiqləşməsinə dair yaxın günlərdə rəsmi informasiyanın verilməsi gözləniləndir. 

Sentyabrın 18- də digər dünya liderləri, o cümlədən ABŞ Prezidenti Cozef Bayden de Britaniyada olacaq. Yəqin ki, Ərdoğan fürsətdan istifadə edib bəzi hökumət və dövlət başçıları ilə görüşlər keçirəcək. 

Türkiyə liderinin xüsusilə Britaniyanın yeni Baş naziri Liz Trassla görüşəcəyi ehtimalı böyükdür. Tərəflər Ankara ilə London arasındakı ikitərəfli əlaqələrlə yanaşı, digər regional və qlobal məsələləri, o cümlədən Ukraynadakı durumu müzakirə edə bilərlər. 

Doğrudur, Britaniyanın xarici siyasət kursunda ciddi dəyişiklərin baş verəcəyi gözlənilmir. Yəni, yəqin ki, Türkiyə ilə münasibətlər də olduğu templə davam edəcək. Buna baxmayaraq, ikitərəfli əlaqələrin perspektivləri barədə fikir mübadiləsi aparılması hər iki tərəf üçün maraqlıdır. Bu, NATO daxilindəki əməkdaşlıq üçün də lazımdır. 

Bundan başqa, xarici KİV-in yazdığına görə, bu ay Ərdoğanla Baydenin görüşü gözlənilir. Türkiyəyə lideri oktyabra qədər Vaşinqtona səfər edə bilər. Həmin səfərədək liderlərin Britaniyada görüşmələri mümkündür. Hər halda prezidentlərin fikir mübadiləsi apara biləcəkləri xeyli mövzu var. Bura Ukraynada və Suriyadakı durum, F-16 təyyarələrinin tədarükü, Yunanıstanla münasibətlər və digər məsələlər daxildir. 

Ərdoğanın digər dünya liderləri ilə də görüşməsi  mümkündür. Doğrudur, Kraliçanın vəfatı dünya üçün böyük itkidir. Amma bu həm də dövlət və hökumət başçılarının bir araya gəlmələri üçün fürsətdir. Yəqin ki, bəzi liderlər, o cümlədən Ərdoğan bu fürsəti qiymətləndirəcək.

Kənan Novruzov, 

siyasi ekspert