Pakistanın keçmiş Baş naziri, müxalif “Ədalət naminə hərəkat” partiyasının təsisçisi İmran Xan Nobel Sülh Mükafatına namizəd göstərilib.
“The Times of India” portalı xəbər verir ki, İ.Xanın namizədliyini “Pakistan World Alliance” hüquq müdafiə təşkilatı irəli sürüb.
Bildirilib ki, keçmiş Baş nazir Pakistanda demokratik dəyərlərin və insan haqlarının qorunmasına verdiyi töhfəyə görə namizəd olaraq göstərilib.
Qeydeək ki, İmran Xan ikinci dəfədir bu nüfuzlu mükafata namizəd göstərilir. 2019-cu ildə o, Hindistanla münasibətlərdə hərbi gərginliyin azaldılması istiqamətindəki səylərinə görə Pakistanda Nobel Sülh Mükafatına namizəd göstərilmiş və o zaman ölkə parlamentinə onun namizədliyinin dəstəklənməsi barədə qətnamə təqdim edilmişdi. Lakin Xan Nobel Mükafatına layiq olmadığını bildirmiş və qeyd etmişdi ki, bu mükafatı "Pakistan-Hindistan mübahisəsinin Kəşmir məsələsi üzrə yekun həllinə nail olan və subkontinentdə sülhə yol açan" siyasətçi almalıdır.
İmran Xan 2018-2022-ci illərdə Pakistanın Nazirlər Kabinetinə rəhbərlik edib. O, 10 aprel 2022-ci ildə parlamentdə ona qarşı etimadsızlıq votumu nəticəsində vəzifəsindən uzaqlaşdırılıb. Siyasətçi 2023-cü ildən etibarən hakimiyyətdən sui-istifadə və korrupsiya ittihamı ilə 14 illik həbs cəzası çəkir.
