ABŞ-ın Ukraynada vəziyyətin nizamlanması üzrə Rusiya ilə danışıqları davam etdirməsi və sülh planı üzərində işləməsi fonunda Qərbi Avropa ölkələri uzunmüddətli hərbi münaqişəyə hazırlaşır.

Senzor.az bildirir ki, bunu Macarıstanın Baş naziri Viktor Orban “Kossuth” radiostansiyasına müsahibəsində deyib.

“Qərbi avropalılar hərbi plan hazırladılar. Onlar Ukrayna ordusunu dəstəkləmək üçün əhəmiyyətli xərclərə ümid edirlər və uzunmüddətli müharibəyə hazırlaşırlar”, - Orban bildirib.

Onun fikrincə, Qərbi Avropa liderləri Trampa nifrət edirlər və onun səyləri uğursuzluqla nəticələnsə bundan məyus olmayacaqlar. Lakin ABŞ Prezidenti artıq heyrətamiz uğur qazanıb.

“Onun hərəkətləri nəticəsində bu müharibə daha biz tərəfə, Qərbi Avropaya yayılmayacaq. Belə bir vəziyyətdə avropalılar müdaxilə etməsələr, ona dəstək versələr daha yaxşı olar”, - Macarıstanın Baş naziri vurğulayıb.

Bundan əvvəl Viktor Orban Budapeştin Vaşinqtonla Moskva arasında dialoqu dəstəklədiyini dəfələrlə diqqətə çatdırıb.