"Putinlə sonuncu söhbətimizdə biz Rusiyadan kasıb ölkələrə taxıl və gübrə çatdırılması imkanlarını müzakirə etdik. Ümid edirəm ki, bu problemi həll edə bilərik”

Senzor.az yerli KİV-ə istinadən bildirir ki, bunu Türkiyə Prezidenti Rəcəb Tayyib Ərdoğan bazar günü Diyarbəkir şəhərində gənclərlə söhbət edərkən deyib.

Ərdoğan taxıl müqaviləsinin davamı olaraq Rusiyadan əsasən yoxsul ölkələrə kənd təsərrüfatı məhsulları və gübrələrin tədarükünə başlanacağına ümid etdiyini bildirib.

"Biz yoxsul ölkələri, o cümlədən Afrikanı təkcə taxılla təmin etmək üçün addımlar atmamışıq, söhbət gübrələrdən də gedir. Ciddi şəkildə quraqlıq yaşayan bu ölkələrə gübrə problemlərinin həllində kömək etmək lazımdır", - o bildirib.

Türkiyə lideri əlavə edib ki, son bir ayda Putin və Ukrayna Prezidenti Volodimir Zelenski ilə 5 dəfə danışıb. Bundan əlavə, onun sözlərinə görə, ABŞ Prezidenti Co Baydenlə Ukrayna böhranını həll etmək üçün telefon diplomatiyasını davam etdirir.