“Rusiya Ermənistanın Gümrü şəhərindəki 102-ci hərbi bazasını çıxarmaq istəsə, etiraz etməyəcəyik”.
Senzor.az yerli KİV-ə istinadən bildirir ki, bunu Ermənistanın Baş naziri Nikol Paşinyan deyib.
“İndiyədək Rusiya hərbi bazası məsələsini heç vaxt qaldırmamışıq. Və Rusiyanın 102-ci hərbi bazasının Ermənistan ərazisində olmasını həyati zərurət hesab etmirik. Əgər Rusiya hərbi bazanı Ermənistandan çıxarmaq qərarına gəlsə, etiraz etməyəcəyik, amma onlar qalmaq istəsələr, bunu da müzakirə etməyə hazırıq. Lakin biz bu müddət ərzində bu məsələləri heç vaxt qaldırmamışıq”, - o bildirib.
Xatırladaq ki, Rusiya Prezidenti Vladimir Putin sentyabrın 1-də Bişkekdəki mətbuat konfransında, İrəvan Ermənistandakı Rusiya hərbi bazasına ehtiyac olmadığını hesab edərsə, Moskvanın onu çıxarmağa hazır olduğunu bildirmişdi: “Əgər Ermənistan hesab edirsə ki, Rusiya hərbi bazası ölkədə lazım deyil, biz lap günü sabah gedərik”.
