Moskva vilayətinin “Crocus City Hall” konsert zalındakı terror aktını kimin törətdiyi hələ də məlum deyil.
Onların kim olduqları, motivlərinin nə olduğu və indi harada olduqları hələ aydın deyil.
Şahidlər onları “qəhvəyi paltarlı insanlar” kimi təsvir edirlər: “ya jilet idi, ya da kamuflyaj”. Hadisə şahidlərinin heç biri hələlik onların neçə nəfər olduğunu dəqiqləşdirməyib. Bir nəfər hücum edənlərin heç nə qışqırmadığını deyib. Üstəlik, onların maska taxmadıqlarını söyləyib. Bununla belə, başqa bir şahid hücum edənlərin üzlərinin şərflərlə örtüldüyünü, altından saqqalların göründüyünü vurğulayıb.
“Krokus”a hücumdan sonra ortaya çıxan videolara əsaslanaraq, azı üç hücum edən şəxsin olduğu qənaətinə gəlmək olar.
Daha sonra “Baza” bildirib ki, hüquq-mühafizə orqanları cinayət yerindən qaçmış ola biləcək “kamuflyaj geyimli dörd kişini” axtarırlar. Ardınca dövlət agentliyi “RİA Novosti” Tver qeydiyyat nömrəli ağ rəngli “Renault Symbol” avtomobilinin fotosunu dərc edib. 
“Novaya qazeta Yevropa” avtomobilin öncəki sahibini müəyyənləşdirib. 24 yaşlı kişi avtomobili “təxminən bir həftə əvvəl arvadının qardaşına satdığını” deyib, o da öz növbəsində dostunun maşını istədiyini söyləyib.
Rusiya mətbuatı avtomobilin rəngləndiyini müəyyən edib: nəqliyyat vasitəsi daha öncə qara rəngdə olub.
Eynin zamanda, mətbuatda yol-müşahidə kamerasının çəkdiyi görüntülər də yer alıb. Maşında iki kişi görünsə də, lakin yalnız birinin üz cizgilərini görmək olur: o, papaqlıdır, qara saçlı olduğu sezilir, kamulyajı xatırladan geyimdə olduğu görünür. Bununla belə, bu şəxslərin “Krokus”a hücumla əlaqəsi olub-olmadığı aydın deyil.
Daha sonra təhlükəsizlik qüvvələrinin ikinci avtomobili, boz rəngli “Renault Fluence” avtomobilini axtardığına dair məlumatlar ortaya çıxıb. Bu məlumatın rəsmi təsdiqi yoxdur.
“Kommersant” hüquq-mühafizə orqanlarına istinadən xəbər verir ki, hücum edənlər hərbi və ya straykbol təlimdən keçiblər.
Bir neçə anonim teleqram kanalı terrorçuların Bryansk vilayətində “göründüyünü” və onlardan birinin öldürüldüyünü yazıb. Amma bu məlumat da təsdiqini tapmayıb.
Ümumiyyətlə, Rusiya rəsmiləri şübhəli şəxslərlə bağlı hər hansısa dolğun məlumat təqdim etməyib.
“Report” xatırladır ki, martın 22-də Rusiyanın Moskva vilayətinin Krasnoqorsk şəhərindəki “Crocus City Hall” konsert zalında terror aktı törədilib. Naməlum şəxslər məkana daxil olaraq insanları güllələməyə başlayıb, daha sonra yanğın törədərək hadisə yerindən uzaqlaşıblar. Onların saxlanılıb-saxlanılmaması barədə məlumat verilməyib. Şübhəli şəxslərin beş nəfər olduğu güman edilir.
Senzor.az son məlumata istinadən bildirir ki, teraktda ümumilikdə 82 nəfər ölüb, 147 nəfər isə yaralanıb.
Onu da qeyd edək ki, terror aktının baş verdiyi “Crocus City Hall”ın ərazisi Rusiyanın çevik qüvvələr tərəfindən mühasirəyə alınıb, bina boyunca bir neçə yanğınsöndürən maşın var. Ərazidə xilasedicilər və müstəntiqlər işləyirlər.
Rusiya Prezidenti “Crocus City Hall”a hücumla bağlı rusiyalılara müraciət etməyib. “RİA Novosti” müraciətin anonsunu versə də, sonradan elanı “texniki xəta” adlandırıb.
