Ukraynaya təzminat ödəmədən Rusiya dondurulmuş aktivlərini geri almayacaq.
“Reuters” xəbər verir ki, bunu Avropa İttifaqının (Aİ) Xarici İşlər və Təhlükəsizlik Siyasəti üzrə Ali nümayəndəsi Kaya Kallas deyib.
“Atəşkəs və ya sülh sazişi elan olunarsa, Ukraynaya təzminat ödənilmədən bu aktivlərin Rusiyaya qaytarılacağını təsəvvür edə bilmərik”, - Aİ diplomatiyasının rəhbəri bildirib.
Aİ-nin məlumatına görə, Rusiyanın təxminən 210 milyard avroluq (245,85 milyard ABŞ dolları) aktivləri Ukraynaya müdaxiləyə görə Moskvaya tətbiq edilən sanksiyalar çərçivəsində dondurulub. Ukrayna və Aİ-nin bəzi üzvləri, o cümlədən Polşa və Baltikyanı ölkələr Brüsseli bu aktivləri müsadirə və onları Kiyevi dəstəkləmək üçün istifadə etməyə çağırıblar.
Xatırladaq ki, bundan əvvəl “Politico” nəşri Ukraynanın bərpası üçün Avropa Komissiyasının (AK) Rusiyanın dondurulmuş 200 milyard avroluq aktivlərini daha riskli investisiyalara köçürmək variantını nəzərdən keçirdiyini yazıb.
