Xəbər verdiyimiz kimi, Ermənistanın iki vətəndaşı-İşxan Verdyan və Vahe Qambaryan ayrı-ayrılıqda Prezident İlham Əliyevə müraciət edərək onlara Azərbaycan vətəndaşlığı verilməsini xahiş ediblər. Müraciət edən ermənilər, Xankəndində yaşamaq istədiklərini də vurğulayıblar.
Senzor.az bildirir ki, Azərbaycan Milli Məclisinin deputatı Fazil Mustafa məsələ ilə bağlı “Fasebook”da maraqlı status paylaşıb.
Dəyərli millət vəkili qeyd edib ki, buna adi müraciət kimi baxmaq lazım deyil: “Erməni əsilli keçmiş Azərbaycan vətəndaşları yenidən vətəndaşlığımızı qəbul üçün müraciət edirlər. Buna adi bir müraciət kimi baxmaq lazım deyil. "Hiyləgərlik edirlər", "inanmaq olmaz" kimi ifadələrin də yeri deyil. Sadəlövh olmayaq, abdəst alıb müsəlman olacaq erməni axtarışında deyilik ki... Bizim hədəfimiz nədir, Azərbaycan vətəndaşlığını qəbul edən, onun qanunlarına tabe olan ermənilərin Qarabağda yaşamasına təminat vermək. Belədirsə, siyasi cəhətdən ağıllı davranmağa məhkumuq, belə bir tendensiyanın inkişafına imkan yaratmalıyıq. Fikrimcə, ilkin mərhələdə Qarabağın bizim nəzarətimiz altında olan erməni kəndlərinin birində Azərbaycan vətəndaşlığını qəbul edən erməniləri yerləşdirib, onlarla bağlı dünyaya təbliğatı çatdırmalıyıq. Bir erməni kəndi obrazı yaratmaq və birgəyaşayış modelini təqdim və təbliğ etmək. Yəni görürsünüzmü, vətəndaşlığımızı qəbul edən ermənilərlə hər hansı problemimiz yoxdur. Normal Azərbaycan vətəndaşı kimi yaşaya bilirlər. Təbii ki, hərtərəfli nəzarət mexanizmini düşünərək. İndilik ikidirlər, stimullaşdırsaq sayları arta bilər. Buradan da Azərbaycan vətəndaşlığını qəbul edən ermənilər və terrorçu, yaxud da separatçı ermənilər ayrımını diplomatiyada daha sıx-sıx istifadə etməmiz mümkündür. Həm də təkcə diplomatiyada deyil”.
