HƏMAS-ın Siyasi Bürosunun rəhbəri İsmail Haniyə təxminən 7 kq ağırlığında döyüş başlığı olan qısamənzilli raketlə öldürülüb.

Senzor.az RBK-ya istinadən bildirir ki, İslam İnqilabı Keşikçiləri Korpusunun (SEPAH) yayımladığı bəyanatda belə deyilir.

"Araşdırma və təhlillərə əsasən, bu terror əməliyyatı qonaqların yaşadığı ərazidən kənarda, yaxın məsafədən atılan mərmi ilə həyata keçirilib", - deyə məlumatda vurğulanıb.

SEPAH-dan əlavə edilib ki, sui-qəsd ABŞ hökumətinin dəstəyi ilə İsrail tərəfindən planlaşdırılıb və həyata keçirilib.

"Şəhid Haniyənin qan qisasının alınacağı aydındır. Bu cinayətə görə qəti addımlar atılacaq. Münasib vaxtda, müvafiq yerdə və üsulla sərt cəza olacaq", - deyə bəyanatda xəbərdarlıq edilib.

Bu arada "Haber Global" İsmayıl Haniyəyə qarşı təşkil olunan və ölümü ilə nəticələnən sui-qəsdlə bağlı digər dəlillərin əldə edildiyindən yazıb.

Etibarlı qaynaqlara əsaslanan məlumata görə, İran təhlükəsizlik və kəşfiyyat orqanlarının Haniyənin öldürüldüyü binada apardığı hərtərəfli araşdırmalar zamanı binanın eyni mərtəbəsində daha 3 otaqda partlayıcı qurğular tapılıb.

İranda müharibə veteranları üçün ayrılan "Veteranlar evi" adlı iqamətgahın eyni mərtəbəsində aşkarlanan partlayıcılar təhlükəsizlik baxımından boşluqdan istifadə edildiyini göstərir və Haniyənin otağını dəyişə biləcəyi ehtimalına qarşılıq olaraq nəzərdə tutulan planın bir hissəsi kimi qiymətləndirilir. Həmçinin sözügedən partlayıcıların uzaqdan idarəetmə kilidinə bağlı olduğu iddia edilib.

İsmayıl Haniyənin otağına partlayıcıların yerləşdirilməsində İranın bəzi təhlükəsizlik agentlərinin birbaşa və ya dolayı yolla iştirak etdikləri də iddialar sırasındadır. Sui-qəsd əməliyyatında İslam İnqilabı Keşikçiləri Korpusunun (SEPAH) tərkibində yer alan və İranın yüksəkrütbəli məmurlarının təhlükəsizliyinə cavabdeh olan "Ənsar Əl Mehdi" adlı bölmədəki şəxslərdən istifadə olunduğu təxmin edilir.

İran səlahiyyətlilərinin araşdırdıqları binanın təhlükəsizlik kamerası görüntülərində hazırda şübhəli kimi istintaqa cəlb olunan şəxslərin bir neçə dəqiqə ərzində bir neçə otağa əllərində əşyalarla girib-çıxdıqları əks olunub.

Sui-qəsdi həyata keçirənlərin və onlara yardım edən, "köstəbək" adlandırılan əlbir şəxslərin hələ də İran sərhədləri daxilində olduğu ehtimal edilir.

İran baş verən hadisənin təhlükəsizliyin gözardı edilməsi ilə bağlı olub-olmadığını araşdırmaq üçün genişmiqyaslı işçi qrupu yaradıb.

Xatırladaq ki, İsmayıl Haniyə və bir cangüdəni İranın yeni seçilmiş Prezidenti Məsud Pezeşkianın andiçmə mərasimində iştirak etdikdən sonra Tehrandakı iqamətgahına raket hücumu nəticəsində öldürülüb. İranın Ali Lideri ayətullah Əli Xamenei Haniyənin öldürülməsinə cavab olaraq hərbi qüvvələrə İsrailə birbaşa zərbə endirmək əmri verib. HƏMAS-ın Livandakı nümayəndəsi Mahmud Tah Haniyənin öldürülməsinə görə məsuliyyəti İsrail və ABŞ-ın üzərinə qoyub.

Bundan əvvəl "The New-York Times" öz mənbələrinə istinadla xəbər verib ki, SEPAH Haniyəyə Tehrandakı sui-qəsdlə əlaqədar ölkənin təhlükəsizlik xidmətinin işçiləri də daxil olmaqla kütləvi həbslər həyata keçirib.