Ağdam rayonunun Qalayçılar kəndi ərazisində baş vermiş mina hadisəsi nəticəsində 3 nəfər yaralanıb.
Senzor.az bildirir ki, bu barədə TƏBİB məlumat yayıb.
Məlumata görə, mina xəsarəti alan 3 nəfər (2 kişi cinsli, 1 qadın cinsli) Bərdə Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
1983-cü il təvəllüdlü Məmmədov Səbuhi Elman oğluna sağ aşıq baldır oynağının travmatik amputasiyası diaqnozu ilə əməliyyat təyin edilib. Hazırda vəziyyəti ağır qiymətləndirilir.
2012-ci il təvəllüdlü Məmmədova Dəniz Səbuhi qızına hər iki aşağı ətraf və döş qəfəsinin qəlpə yaraları, 2014-cü il təvəllüdlü Məmmədov Elmar Səbuhi oğluna isə hər iki aşağı ətrafın və qarnın ön səthinin və sol yuxarı ətrafın qəlpə yaraları diaqnozları təyin edilib. Hazırda müalicələri davam etdirilir, vəziyyətləri stabildir.
**11:23
Aprelin 6-da Ağdam rayonunun Qalayçılar kəndi ərazisində də mina hadisəsi qeydə alınıb.
Senzor.az bildirir ki, bu barədə Daxili İşlər Nazirliyi (DİN), Baş Prokurorluq və ANAMA-nın Mətbuat xidmətləri birgə məlumat yayıblar.
Qeyd olunub ki, Qalayçılar kəndinin 1983-cü il təvəllüdlü sakini Məmmədov Səbuhi Elman oğlu minalardan təmizlənməmiş əraziyə daxil olub və piyada əleyhinə minanın partlayışı nəticəsində ayağından xəsarət alıb. Xəsarət alan şəxs xəstəxanaya təxliyə edilib.
Faktla bağlı Ağdam Rayon Prokurorluğunda araşdırma aparılır.
“ANAMA, DİN və Baş Prokurorluq bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa və bələd olmadıqları ərazilərə daxil olmamağa çağırır!”, – məlumatda qeyd olunub.
Xatırladaq ki, daha əvvəl ANAMA öz əməkdaşının Cəbrayıl rayonunda minaya düşdüyünü bildirmişdi.
