İyulun 15-də Moskvada və vilayətin bəzi ərazilərində, eləcə də qonşu rayonlarda güclü leysan xarakterli tufan müşahidə olunub.
Senzor.az-ın yerli KİV-ə istinadən məlumatına görə, Rusiya Hidrometeorologiya Mərkəzi küləyin sürətinin saniyədə 20 metrə çatdığını bildirib.
Şəhərin bəzi ərazilərində iki saatdan az müddətdə bir aylıq yağış yağıb, ən güclü yağışlar paytaxtın şimal, şərq, şimal-şərq və cənub-şərqində müşahidə edilib.
Güclü yağış və külək ən azı gecə yarısına kimi davam edəcək. Hidrometeoroloq Yevgeni Tişkovetsin proqnozuna görə, yağışlar iyulun 18-i cümə gününə qədər davam edəcək. Günəşli və quru hava yalnız bundan sonra qayıdacaq.
Moskvanın bir çox küçələri, yeraltı keçidlər və metro stansiyaları su altında qalıb. Məsələn, Böyük Dairə Xəttinin “Rijskaya” stansiyasının vestibülü müvəqqəti olaraq bağlanıb. “Teknopark” stansiyasında tavandan su tökülməsi də qeydə alınıb. Hətta eyni ərazidə hərəkətdə olan metro qatarının divarlarından da su axıb.
Bildirilir ki, Ostankino teleqülləsinin yanındakı evə ildırım düşüb. İlkin məlumatlara görə, heç bir fəsad olmayıb.
Patriarx gölünün ərazisindəki küçələr və Mira prospektində avtomobillər demək olar ki, tamamilə su altında qalıb.
Dayanacaqların birində sakinlər hətta su basmasından qorunmaq üçün kiçik “bənd” də tikiblər.
Bildirilir ki, yaxın günlərdə “yamaqlı partlayıcı konveksiya” proqnozlaşdırılır ki, bu da bəzi yerlərdə leysan xarakterli yağışlar və tufandan xəbər verir. Günün sonuna qədər leysan xarakterli yağışın intensiv olacağı, şimşək çaxacağı, güclü dolu düşəcəyi ehtimalı var.
Hidrometeorologiya Mərkəzi həmçinin iyulun 16-dək paytaxt və Moskva vilayətində hava şəraiti ilə bağlı “narıncı” təhlükə səviyyəsi elan edib.
