Fransa Prezidenti Emmanuel Makronun BMT Baş Assambleyasının (BA) sentyabr sessiyasında Fələstin dövlətini tanımağa hazır olması barədə bəyanatı antisemitizmi qızışdırır.
"Politico" nəşrinin verdiyi xəbərə görə, bu barədə İsrailin Baş naziri Benyamin Netanyahunun Fransa liderinə göndərdiyi məktubda bildirilir.
"Sizin Fələstin dövlətinin yaradılmasına çağırışınız bu antisemit atəşinə yanacaq qatır", - deyə məktubda qeyd olunub.
Məktubda Netanyahu Fransada son aylarda baş verən bəzi antisemitizm hadisələrinə işarə edib. Onun fikrincə, bunlar Fransanın İsraillə bağlı siyasəti ilə əlaqədardır. Qeyd olunur ki, Parisin qərarı HƏMAS-ın (Fələstin hərəkatı) terrorunu təşviq edir, girovları azad etmək istəməmə istəyini gücləndirir, Fransada yaşayan yəhudiləri təhdid edənləri cəsarətləndirir və hazırda Fransanın küçələrində hökm sürən yəhudilərə nifrəti artırır.
Xatırladaq ki, iyulun 24-də Makron "X" hesabında Fransanın BMT-nin Baş Assambleyasının sentyabrda keçiriləcək sessiyasında Fələstin dövlətini rəsmən tanıyacağını yazıb.
